Get real time updates directly on you device, subscribe now.
ଦିଗପହଣ୍ଡି: ପୁଣିଥରେ ଚର୍ଚ୍ଚାକୁ ଆସିଛି ଦିଗପହଣ୍ଡି ରାଜନୀତି। ବ୍ଲକ୍ ଅଧ୍ୟକ୍ଷ ଉପନିର୍ବାଚନକୁ ନେଇ ଦିଗପହଣ୍ଡି ରାଜନୀତି ବେଶ୍ କିଛିଦିନ ସରଗରମ ରହିଥିଲା। ଏଥର କିନ୍ତୁ ଭିନ୍ନ ଏକ ପ୍ରସଙ୍ଗକୁ ନେଇ ହଟଚମଟ ସୃଷ୍ଟି ହୋଇଛି। ଦିଗପହଣ୍ଡି ରାଜନୀତିରେ ତନ୍ତ୍ରବିଦ୍ୟା ପ୍ରୟୋଗକୁ ନେଇ ଏକ ଘଟଣା କେବଳ ଜିଲ୍ଲା ନୁହେଁ, ରାଜ୍ୟ ରାଜନୀତିରେ ମଧ୍ୟ ଚର୍ଚ୍ଚାର ଖୋରାକ୍ ଯୋଗାଇଛି। ଗୋଟିଏ ବରଗଛ ତଳେ କିଛି ନେତାଙ୍କ ଚିରା ଫଟୋ ପଡ଼ିଥିବା ବେଳେ ତନ୍ତ୍ରପୂଜା କରାଯାଇଥିବା ଦେଖିବାକୁ ମିଳିଛି। ଯାହାକୁ ନେଇ ଦିଗପହଣ୍ଡି ରାଜନୀତିରେ ଏବେ ଭିନ୍ନ ଚର୍ଚ୍ଚା ଆରମ୍ଭ ହୋଇଯାଇଛି। ଦିଗପହଣ୍ଡି-ସାନଖେମୁଣ୍ଡି ସୀମାନ୍ତ ଅଁଳାଗୁଡ଼ା ନିକଟବର୍ତ୍ତୀ ଏକ ଜଙ୍ଗଲ ରାସ୍ତାରେ ଏଭଳି ଫଟୋ ପଡ଼ିଥିବା ଦେଖିବାକୁ ମିଳିଛି। ଯାହାର କିଛି ଫଟୋ ଓ ଭିଡ଼ିଓ ଭାଇରାଲ୍ ହେବା ପରେ ଏହି କଥା ସାମ୍ନାକୁ ଆସିଛି। ସେଠାରେ ଦିଗପହଣ୍ଡି ବିଧାୟକ ସ୍ୱର୍ଗତ ସୂର୍ଯ୍ୟନାରାୟଣ ପାତ୍ରଙ୍କ ପୁଅ ବିପ୍ଳବ ପାତ୍ର, ସ୍ବର୍ଗତ ପାତ୍ରଙ୍କ ବ୍ୟକ୍ତିଗତ ସହାୟକ ଥିବା ସି.ଏଚ୍ ସୀମାଦ୍ରି ପାତ୍ର, ଜିଲ୍ଲା ପରିଷଦ ସଭ୍ୟ ନିରଞ୍ଜନ ରେଡ୍ଡିଙ୍କ ଫଟୋ ଚିରା ହୋଇ ପଡ଼ିଥିବା ଦେଖିବାକୁ ମିଳିଛି।