Get real time updates directly on you device, subscribe now.
ସାରା ଦେଶରେ ବ୍ରେକ ଫେଲ ହୋଇଛି କରୋନା । ନିୟନ୍ତ୍ରଣ ବାହାରେ ସଂକ୍ରମଣ । ସବୁଆଡେ ଭୟଙ୍କର ସ୍ଥିତି ସୃଷ୍ଟି ହୋଇଛି । କେଉଁଠି ବେଡ଼ ନାହିଁ ତ, କେଉଁଠି ଅକ୍ସିଜେନ ଅଭାବ । ଆଉ କେଉଁଠି ମେଡିକାଲ ବାରଣ୍ଡାରେ ପଡିରହିଛି ରୋଗୀ । ପ୍ରତିଦିନ ଦେଶର ବିଭିନ୍ନ ରାଜ୍ୟରୁ କରୋନାର ଏଭଳି କରୁଣ ଚିତ୍ର ଆସୁଛି ଯାହା ଦେଖିଲେ ବା ଶୁଣିଲେ ଲୋମଟାଙ୍କୁରି ଉଠିବ । ଦୈନିକ ସଂକ୍ରମଣ ସହ ମୃତ୍ୟୁ ମଧ୍ୟ ତାଳଦେଇ ବଢ଼ିବା ଆରମ୍ଭ ହେଲାଣି।ସ୍ଥିତି ଦିନକୁ ଦିନ ବେକାବୁ ହେଉଥିବା ବେଳେ ଲୋକଙ୍କ ମନରେ ଭୟ ମଧ୍ୟ ସୃଷ୍ଟି ହେଲାଣି। ଭାରତରେ ଦୈନିକ ସଂକ୍ରମଣ ପ୍ରତିଦିନ ରେକର୍ଡ ଭାଙ୍ଗୁଛି । ଆକ୍ରାନ୍ତଙ୍କ ସଂଖ୍ୟା ସାଢେ ୩ଲକ୍ଷ ଉପରେ ଥିବାବେଳେ ମୃତ୍ୟୁ ସଂଖ୍ୟା ମଧ୍ୟ ୩ ହଜାର ଟପିଛି ।
ସୁଅ ପରି ମାଡି ଚାଲିଛି ସଂକ୍ରମଣ । ଆକ୍ରାନ୍ତଙ୍କ ସଂଖ୍ୟା ସହ ତାଳଦେଇ ମୃତ୍ୟୁ ସଂଖ୍ୟା ମଧ୍ୟ ବଢିଚାଲିଛି । ଗତ ୨୪ ଘଂଟାରେ ଦେଶରେ ୩,୬୦,୯୬୦ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି । ଦେଶରେ ମୋଟ କରୋନା ସଂକ୍ରମିିତଙ୍କ ସଂଖ୍ୟା ୧ କୋଟି ୭୯ ଲକ୍ଷ ୯୭ ହଜାର ୨୬୭ ରେ ପହଂଚିଛି । ସେମାନଙ୍କ ମଧ୍ୟରୁ ୧ କୋଟି ୪୮ ଲକ୍ଷ ୧୭ ହଜାର ୩୭୧ ଜଣ ସୁସ୍ଥ ହୋଇଥିବା ବେଳେ ଆକ୍ଟିଭ୍ କେସ୍ ସଂଖ୍ୟା ୨୯ ଲକ୍ଷ ୭୮ ହଜାର ୭୦୯ ରହିଛି । ଏହା ସହ କରୋନାରେ ମୃତ୍ୟୁ ସଂଖ୍ୟା ୩ ହଜାର ଟପିଛି । ଦିନକରେ ୩୨୯୩ ଲୋକଙ୍କ ଜୀବନ ନେଇଛି ମହାମାରୀ । କରୋନା ଦେଶରେ ପ୍ରବେଶ କରିବା ଦିନଠାରୁ ଏହା ସର୍ବାଧିକ। ସେହିପରି ନୂଆ ମୃତକଙ୍କୁ ମିଶାଇ ଦେଶରେ ମୋଟ କରୋନା ଜନିତ ମୃତ୍ୟୁସଂଖ୍ୟା ୨ ଲକ୍ଷ ପାର କରି ଯାଇଛି।
ଭାରତରେ କରୋନା ସ୍ଥିତି ଆଗକୁ ଆହୁରି ସାଂଘାତିକ ହେବ ବୋଲି ବିଶେଷଜ୍ଞମାନେ ଆକଳନ କରିଛନ୍ତି। ମେ’ ମାସ ମଧ୍ୟ ଭାଗରେ କରୋନାର ତା’ର ସର୍ବାଧିକ ଗତି ଦେଖାଇବ। ଏହି ସମୟରେ ଦୈନିକ ମୃତ୍ୟୁସଂଖ୍ୟା ୫ ହଜାର ପାର କରିବ ବୋଲି ମଧ୍ୟ ଆଶଙ୍କା ପ୍ରକାଶ ପାଇଛି। ସେପଟେ ମହାରାଷ୍ଟ୍ରରେ ଗୋଟିଏ ଦିନରେ ସର୍ବାଧିକ ୮୯୫ ଜଣ ପ୍ରାଣ ହରାଇଥିବା ବେଳେ ଦିଲ୍ଲୀରେ ୩୮୦ ଜଣଙ୍କ ଜୀବନ ଯାଇଛି।