Get real time updates directly on you device, subscribe now.
ନୂଆଦିଲ୍ଲୀ : ଜନ୍ମଦିନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନୂଆଦିଲ୍ଲୀର ଦ୍ୱାରକାରେ ଇଣ୍ଡିଆ ଇଣ୍ଟରନ୍ୟାସନାଲ କନଭେନସନ ଓ ଏକ୍ସପୋ ସେଣ୍ଟର ବା ଯଶୋଭୂମିର ପ୍ରଥମ ପର୍ୟ୍ୟାୟ ଉଦଘାଟନ କରିଛନ୍ତି। ‘ଯଶୋଭୂମି’ରେ ପହଞ୍ଚିବା ପରେ ପ୍ରଧାନମନ୍ତ୍ରୀ ଏହି କେନ୍ଦ୍ର ବୁଲି ଦେଖିଥିଲେ । ‘ଯଶୋଭୂମି’ରେ ବିଶ୍ୱସ୍ତରୀୟ ବୈଠକ, ସମ୍ମିଳନୀ ଏବଂ ପ୍ରଦର୍ଶନୀ ଆୟୋଜିତ ହୋଇପାରିବ।
ଏହା ବିଶ୍ବର ସବୁଠୁ ବଡ଼ ସମ୍ମିଳନୀ ଏବଂ ପ୍ରଦର୍ଶନୀ ସ୍ଥଳ ମଧ୍ୟରେ ଅନ୍ୟତମ ୭୩,୦୦୦ ବର୍ଗ ମିଟର ପରିସରରେ ବ୍ୟାପ୍ତ ଏହି ସମ୍ମିଳନୀ କେନ୍ଦ୍ରରେ ୧୫ଟି ସମ୍ମିଳନୀ କକ୍ଷ ଅଛି । ଏଥିରେ ମୁଖ୍ୟ ଅଡିଟୋରିୟମ୍, ଭବ୍ୟ ବଲ୍ ରୁମ୍ ଏବଂ ମୋଟ ୧୧,୦୦୦ ପ୍ରତିନିଧୀଙ୍କ ବସିବା କ୍ଷମତା ସହିତ ୧୩ଟି ମିଟିଂ ରୁମ୍ ଅନ୍ତର୍ଭୁକ୍ତ । ଏହି ସମ୍ମିଳନୀ କେନ୍ଦ୍ରରେ ଦେଶର ସର୍ବବୃହତ ଏଲଇଡି ମିଡିଆ ସ୍କ୍ରିନ ରହିଛି। ଏହାର ମୁଖ୍ୟ ଅଡିଟୋରିୟମରେ ପ୍ରାୟ ୬ ହଜାର ଲୋକ ବସିବାର କ୍ଷମତା ରହିଛି।
ଅତ୍ୟାଧୁନିକ ବସିବା ସୁବିଧା ଥିବା କନଭେନସନ୍ ସେଣ୍ଟରର ପୂର୍ଣ୍ଣାଙ୍ଗ ହଲ୍ ପର୍ୟ୍ୟଟକଙ୍କୁ ବିଶ୍ୱସ୍ତରୀୟ ଅନୁଭୂତି ପ୍ରଦାନ କରିବ। ପାଖାପାଖି ୫୪୦୦ କୋଟି ଟଙ୍କା ବ୍ୟୟରେ ନିର୍ମିତ ଏବଂ ମୋଟ ୮.୯ ଲକ୍ଷ ବର୍ଗ ମିଟରରୁ ଅଧିକ ଅଞ୍ଚଳରେ ବ୍ୟାପିଥିବା ‘ଯଶୋଭୂମି’ ବିଶ୍ୱର ସର୍ବବୃହତ ଏମଆଇସିଇ ଗନ୍ତବ୍ୟସ୍ଥଳ ହେବ। ‘ଯଶୋଭୂମି’ର ସମସ୍ତ ସାର୍ବଜନୀନ ପ୍ରସାରଣ କ୍ଷେତ୍ରକୁ ଏପରି ଭାବରେ ଡିଜାଇନ୍ କରାଯାଇଛି ଯେ ଏହା କନଭେନସନ ସେଣ୍ଟର ବାହାରେ ଥିବା ସ୍ଥାନ ସହିତ ନିରନ୍ତରତା ପ୍ରତିପାଦିତ କରେ। ଏହା ଭାରତୀୟ ସଂସ୍କୃତିରୁ ଅନୁପ୍ରାଣିତ ସାମଗ୍ରୀ ଓ ବସ୍ତୁକୁ ନେଇ ନିର୍ମିତ ହୋଇଥିବା ବେଳେ ପିତ୍ତଳ ରଙ୍ଗୋଲି ଢାଞ୍ଚା, ଶବ୍ଦ ଶୋଷଣକାରୀ ଧାତୁ ସିଲିଣ୍ଡର ଏବଂ ଆଲୋକିତ ଢାଞ୍ଚାଯୁକ୍ତ କାନ୍ଥକୁ ପ୍ରତିନିଧିତ୍ୱ କରିଥାଏ।
ପର୍ୟ୍ୟଟକଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ‘ଯଶୋଭୂମି’ରେ ହାଇଟେକ୍ ସୁରକ୍ଷା ବ୍ୟବସ୍ଥା ମଧ୍ୟ ରହିଛି। ୩ ହଜାରରୁ ଅଧିକ କାର୍ ପାଇଁ ଭୂତଳ କାର୍ ପାର୍କିଂ ସୁବିଧାରେ ୧୦୦ରୁ ଅଧିକ ଇଲେକ୍ଟ୍ରିକ୍ ଚାର୍ଜିଂ ପଏଣ୍ଟ ରହିଛି। ସେହିପରି ଦିଲ୍ଲୀ ମେଟ୍ରୋ ଏୟାରପୋର୍ଟ ଏକ୍ସପ୍ରେସ ଲାଇନରେ ମେଟ୍ରୋର ବେଗ ଘଣ୍ଟାପ୍ରତି ୯୦ରୁ ୧୨୦ କିଲୋମିଟରକୁ ବୃଦ୍ଧି କରିବ। ଯାତ୍ରା ସମୟ ହ୍ରାସ କରିବ। ‘ନୂଆଦିଲ୍ଲୀ’ ରୁ ‘ଯଶୋଭୂମି ଦ୍ୱାରକା ସେକ୍ଟର ୨୫’ ପର୍ୟ୍ୟନ୍ତ ମୋଟ ଯାତ୍ରା ପାଇଁ ପ୍ରାୟ ୨୧ ମିନିଟ୍ ସମୟ ଲାଗିବ।