Get real time updates directly on you device, subscribe now.
ଆବୁଧାବି: ଭାରତ ଏବଂ ୟୁଏଇ ମଧ୍ୟରେ ଶିକ୍ଷା ଏବଂ ନବସୃଜନ କ୍ଷେତ୍ରରେ ସହଭାଗୀତାକୁ ମଜବୁତ କରିବା ଏବଂ ଶିକ୍ଷା କ୍ଷେତ୍ରର ପ୍ରୟାସକୁ ତ୍ୱରାନ୍ୱିତ କରିବା ପାଇଁ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ୩ ଦିନିଆ ଗସ୍ତରେ ଆଜି ଆବୁଧାବିରେ ପହଞ୍ଚିଛନ୍ତି। ଭାରତ ଏବଂ ୟୁଏଇ ମଧ୍ୟରେ ଏକ ବୁଝାମଣା ପତ୍ର ସ୍ୱାକ୍ଷରିତ ହୋଇଛି। ବିଶ୍ୱରେ ସୁଯୋଗ ଏବଂ ସାମୁହିକ ବିକାଶ ପାଇଁ ଏହି ବୁଝାମଣା ପତ୍ର ଭାରତ ଏବଂ ୟୁଏଇକୁ ନିଜର ଶକ୍ତି ବୃଦ୍ଧି କରିବାକୁ ସକ୍ଷମ କରିବ। ଉଭୟ ଦେଶର ଉଚ୍ଚତର ଶିକ୍ଷାନୁଷ୍ଠାନ ମଧ୍ୟରେ ଏକାଡେମିକ୍ ଏବଂ ଅନୁସନ୍ଧାନ ସହଯୋଗ ପାଇଁ ଏହି ବୁଝାମଣା ପତ୍ର ପଥ ପରିଷ୍କାର କରିବ, ଦକ୍ଷତା କ୍ଷେତ୍ରରେ ଦକ୍ଷତା ବିକାଶକୁ ସୁଗମ କରିବ ଏବଂ ଛାତ୍ର ଓ ଶିକ୍ଷକଙ୍କ ପାଇଁ ନୂତନ ସୁଯୋଗ ସୃଷ୍ଟି କରିବ।
ମନ୍ତ୍ରୀ ଶ୍ରୀ ପ୍ରଧାନ ପ୍ରଥମେ ଆବୁଧାବିର ୪୨ଟି ପରିଦର୍ଶନ କରିଥିଲେ। ସେହି ବିଦ୍ୟାଳୟଗୁଡିକ ଗଲ୍ଫ ସହଯୋଗ ପରିଷଦ ଅଧୀନରେ ପ୍ରଥମ ସ୍ୱୀକୃତିପ୍ରାପ୍ତ କୋଡିଂ ସ୍କୁଲ। ଏହି ବିଦ୍ୟାଳୟ ଅଭିନବ ଉପାୟ ଅବଲମ୍ବନ କରି ପାରମ୍ପରିକ ଶିକ୍ଷାଗତ ମଡେଲରେ ପରିବର୍ତ୍ତନ ଆଣିଛି। ଏହି ବିଦ୍ୟାଳୟ ନୂତନତ୍ୱ ଏବଂ ବୈଷୟିକ ଅଗ୍ରଗତି ମାଧ୍ୟମରେ ଅତ୍ୟାଧୁନିକ କୋଡିଂ ଏବଂ ଟେକ୍ନୋଲୋଜି ଦକ୍ଷତା ଉପରେ ଗୁରୁତ୍ୱ ଦେଇଥାଏ। ଏହି ଅବସରରେ ଶିକ୍ଷା ମନ୍ତ୍ରୀ ଆବୁଧାବି ଇଣ୍ଡିଆନ୍ ସ୍କୁଲର ଛାତ୍ର ଏବଂ ଇଣ୍ଡିଆ ହାଉସର ଶିକ୍ଷକମାନଙ୍କ ସହ କଥାବାର୍ତ୍ତା କରିଥିଲେ।