Get real time updates directly on you device, subscribe now.
ଯେଉଁମାନେ ରାଜ୍ୟ ବିଜେପିର ପୋଷ୍ଟର ବୟଙ୍କୁ ମାତ୍ ଦେବା ପାଇଁ ଦିଲ୍ଲୀରେ ରହି ରଣନୀତି କରୁଛନ୍ତି, ଆଉ କୈାଣସି ପ୍ରକାରରେ ପ୍ରଭାରୀଙ୍କୁ ପ୍ରଭାବିତ କରିବାକୁ ଚେଷ୍ଟା କରୁଛନ୍ତି, ସେମାନଙ୍କ ରାତିର ନିଦ ଏହି ଖବର ହଜାଇଦେବ । ପଶ୍ଚିମବଙ୍ଗ ନିର୍ବାଚନ ଉପରେ ସାରା ଦେଶର ନଜର ଥିବା ବେଳେ ଗୋଟିଏ ନିର୍ବାଚନ ମଣ୍ଡଳୀ ନନ୍ଦୀଗ୍ରାମ ଏବେ ଫୋକସ ପଏଂଟରେ ରହିଛି । ଏଠାରୁ ନିର୍ବାଚନ ଲଢୁଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ ଆଉ ତାଙ୍କ ବିରୁଦ୍ଧରେ ପ୍ରାର୍ଥୀ ହୋଇଛନ୍ତି ଏକଦା ମମତାଙ୍କ ଏକାନ୍ତ ଅନୁଗତ ଥିବା ଆଉ ଏବେ ବିଜେପିରେ ସାମିଲ ହୋଇଥିବା ଶୁଭେନ୍ଦୁ ଅଧିକାରୀ । ଏହି ଲଢେଇ ପଶ୍ଚିମବଙ୍ଗ ରାଜନୀତିର ଦିଶା ନିର୍ଦ୍ଧାରଣ କରିବ । ଏହି ନିର୍ବାଚନ ଉଭୟ ବିଜେପି ଆଉ ଟିଏମସିର ଶକ୍ତି ପ୍ରଦର୍ଶନର ମଇଦାନ ପାଲଟିଯାଇଛି । ଏହି ନିର୍ବାଚନ ମଣ୍ଡଳୀ ଏବେ ଦେଖୁଛି ସବୁଠାରୁ ହାଇପ୍ରୋଫାଇଲ ଲଢେଇ । ହେଲେ ଓଡିଶା ପାଇଁ ଏହି ନିର୍ବାଚନର ଏକ ବଡ ସଂକେତ ରହିଛି, ଯାହା ଧର୍ମେନ୍ଦ୍ର ପ୍ରଧାନଙ୍କ ବିରୋଧରେ କାର୍ଯ୍ୟ କରୁଥିବା ନେତାଙ୍କ ପାଇଁ ସଂକଟର ସମୟ ଆଣିଦେଇଛି ।
ନନ୍ଦିଗ୍ରାମରେ ମମତାଙ୍କୁ ହରାଇବା ପାଇଁ ମୋଦି-ଶାହା ଯୋଡି ଦାୟିତ୍ୱ ଦେଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ । ଆଉ ଶୁଭେନ୍ଦୁ ଅଧିକାରୀ ନାମାଙ୍କର ଭରିବାକୁ ଗଲାବେଳେ ଧର୍ମେନ୍ଦ୍ର ତାଙ୍କ ପାଖେ ପାଖେ ରହି ପୁରା ପ୍ରଚାର ମଇଦାନର ମଙ୍ଗ ଧରିଛନ୍ତି । ମମତାଙ୍କୁ ନନ୍ଦିଗ୍ରାମରୁ ମାତ୍ ଦେବା ବିଜେପି ପକ୍ଷରେ ଏତେ ସହଜ ହୋଇନପାରେ । ହେଲେ ବିଜେପି ମଧ୍ୟ ସହଜରେ ପରାଜୟ ବରଣ କରିବା ମୁଡରେ ନଥିବା ଭଳି ଲାଗୁଛି । ଆଉ ସେଥିପାଇଁ ମୋଦି-ଶାହାଙ୍କ ଏକାନ୍ତ ଅନୁଗତ ଆଉ ବିଶ୍ୱସ୍ତ ଅଛନ୍ତି ପଶ୍ଚିମବଙ୍ଗର ନନ୍ଦିଗ୍ରାମରେ । ପାଖେ ପାଖେ ରହି ସବୁ କିଛି ମ୍ୟାନେଜ କରୁଛନ୍ତି । ବିଜେପି ଶକ୍ତିପ୍ରଦର୍ଶନର ସୁତ୍ରଧର ସାଜିଛନ୍ତି ଧର୍ମେନ୍ଦ୍ର । ମମତାଙ୍କୁ ହରାଇବାର ଗୁରୁ ଦାୟିତ୍ୱ ପାଇବା ପରେ ସେ ନନ୍ଦିଗ୍ରାମରେ କ୍ୟାମ୍ପ ପକାଇ ବସିଛନ୍ତି ।
ଏହି ଖବର ରାଜ୍ୟ ବିଜେପିର କିଛି ନେତାଙ୍କ ପାଇଁ ସତର୍କଘଂଟି । ଖାସ କରି ପ୍ରଶାସକରୁ ଆସି ସାଂସଦ ହୋଇଥିବା ତଥା ଧର୍ମେନ୍ଦ୍ରଙ୍କ କ୍ୟାମ୍ପ ବିରୋଧରେ କାର୍ଯ୍ୟ କରୁଥିବା ନେତ୍ରୀଙ୍କ ପାଇଁ ଏହା ଏକ ଚ୍ୟାଲେଂଜ ମଧ୍ୟ । କାରଣ ଚର୍ଚ୍ଚା ଅନୁସାରେ ଉଭୟ ଅପରାଜିତା ଆଉ ଧର୍ମେନ୍ଦ୍ରଙ୍କ ଭିତରେ ସଂପର୍କ ଭଲ ନାହିଁ । ଯାହାର ପ୍ରଭାବ ସଂଗଠନ ଉପରେ ପଡୁଥିବା କଥା ବାରମ୍ବାର କୁହାଯାଉଛି । କର୍ମୀ ମଧ୍ୟ ଦ୍ୱନ୍ଦ୍ୱରେ ରହୁଥିଲ ସେମାନେ କାହା କଥା ଶୁଣିବେ ଆଉ ଦଳରେ ସବୁଠାରୁ ଶକ୍ତିଶାଳୀ ନେତା କିଏ । ହେଲେ ନନ୍ଦିଗ୍ରାମର ଦାୟିତ୍ୱ ପାଇ ଧର୍ମେନ୍ଦ୍ର ପ୍ରମାଣିତ କରିଛନ୍ତି ସେ ହିଁ ହେଉଛନ୍ତି ମୋଦି-ଶାହା ଯୋଡିଙ୍କ ଅତ୍ୟନ୍ତ ବିଶ୍ୱସ୍ତ । କେନ୍ଦ୍ରମନ୍ତ୍ରୀ ଟ୍ୱିଟ କରିଥିବା କିଛି ଫଟୋ ନିହାତି ଭାବେ ରାଜ୍ୟ ବିଜେପିର କିଛି ନେତା ଯେଉଁମାନେ ଜାତୀୟ ସ୍ତରରେ ମୁଖପାତ୍ର ହୋଇ କାର୍ଯ୍ୟ କରୁଛନ୍ତି, ସେମାନଙ୍କ ପାଇଁ ଆହ୍ୱାନ ତିଆରି କରିଛି । ଯଦି ଧର୍ମେନ୍ଦ୍ର ପ୍ରଧାନ ନନ୍ଦିଗ୍ରାମରେ ଶୁଭେନ୍ଦୁ ଅଧିକାରୀଙ୍କୁ ଜିତାଇବାରେ ସମର୍ଥ ହୋଇଯାଆନ୍ତି ତେବେ ସେ ହିଁ ସର୍ବଶକ୍ତିମାନ ନେତା ହୋଇ ଉଭା ହେବେ ଏବଂ ଅନ୍ୟ ସମସ୍ତେ ଫିକା ପଡିଯିବେ ଏଥିରେ କୈାଣସି ସନ୍ଦେହ ନାହିଁ ।