Get real time updates directly on you device, subscribe now.
() ନାଟକ ଲେଖା ହେଲା, ଚରିତ୍ର ବଛାଗଲା, ରିହର୍ସଲ ହେଲା, ନାଟକ ଯେଉଁ ମଞ୍ଚରେ ହବା କଥା ସେଠାକୁ ଦଳବଳ ଘେନି ବାହାରିଲେ ବିରୋଧୀ । ଆଉ ଯେଉଁ ସ୍ଥାନରେ ଯାହା ହେବା କଥା ତାର ବ୍ୟତିକ୍ରମ ହେବାରୁ ଫାଟକ ଆଗରେ ଚାଲିଲା ନାଟକ । ଡ୍ରାମା ତ ନୁହେଁ ହାଇ ଭୋଲଟେଜ ଡ୍ରାମା । ନାଟକ ସରିଲା, ଘର ବାହୁଡା ହେଲେ । ଆଉ ପରଦିନ ଅନୁତାପ କରାଗଲା, ନାଟକ କରି କି ଲାଭ ମିଳିଲା ବରଂ ମସ୍ତବଡ ଭୁଲ ହୋଇଗଲା । କିଛି ଏମିତି ନାଟକୀୟ ଢଙ୍ଗରେ କାଲିରୁ ଆଜି ଯାଏଁ ବିଜେଡି- ବିଜେପି ମଧ୍ୟରେ ଡ୍ରାମେବାଜ ଚାଲିଛି । ଆଉ ରାଜ୍ୟ ରାଜନୀତିର ଏ ବିନା ରଙ୍ଗମଞ୍ଚ, ବିନା ରଙ୍ଗ ପାଉଡର ମଖା ନାଟକ ଦେଖୁଛନ୍ତି ରାଜ୍ୟବାସୀ ।
ଦୀର୍ଘ ୬ ଦିନ ହେବ ଧାନକିଣା ପ୍ରସଙ୍ଗ ଓ ବିଜେପି ବିଧାୟକଙ୍କ ଗୃହରେ ଆତ୍ମହତ୍ୟା ଉଦ୍ୟମ ପ୍ରସଙ୍ଗ ନେଇ ବିଧାନସଭା ହୁଲସ୍ତୁଲ ହେଉଥିବା ବେଳେ ମୁଖ୍ୟମନ୍ତ୍ରୀ କାହିଁକି ଗୃହକୁ ଆସୁ ନାହାନ୍ତି ତାକୁ ‘ନିଖୋଜ ନବୀନ’ର ନାରା ଦେଇ କାଲି ନବୀନ ନିବାସ ବାହାରିଥିଲେ ବିଜେପି ସଦସ୍ୟ । ମୁଖ୍ୟମନ୍ତ୍ରୀକୁ ଖୋଜି ଖୋଜି ସେମାନେ ନବୀନ ନିବାସ ଆଗରେ ବବାଲ ମଚେଇଥିଲେ ଆଉ ସ୍ଥିତି ଅଣାୟତ ହେବାରୁ ଖୋଦ ମୁଖ୍ୟମନ୍ତ୍ରୀ ଘରୁ ବାହାରି ବିରୋଧୀ ବିଧାୟକଙ୍କୁ ନବୀନ ନିବାସକୁ ପାଛୋଟି ନେଇଥିଲେ । ଯାହା ରାଜ୍ୟ ରାଜନୀତିର ଏକ ନିଆରା ଚିତ୍ର, ବିରଳ ଘଟଣା ଥିଲା । ନବୀନଙ୍କ ନିମନ୍ତ୍ରଣ ପରେ ଧାନ କିଣା ପ୍ରସଙ୍ଗରେ ବିଜେପି ସଦସ୍ୟମାନେ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଥିଲେ । ନବୀନ ନିବାସରେ ବିରୋଧୀଙ୍କୁ ଫୁଲ, ଚନ୍ଦନ ଦେଇ ସ୍ୱାଗତ କରିବା ପରେ ଆମ୍ବଗଛ ଛାଇ ତଳେ ଆଲୋଚନା କରିଥିଲେ ମୁଖ୍ୟମନ୍ତ୍ରୀ । ଖାଲି ସେତିକି ନୁହେଁ ଆତିଥ୍ୟତା ଦୃଷ୍ଟିରୁ ଖରାରେ ଚାଲି ଚାଲି ଆସିଥିବା ବିଜେପି ବିଧାୟକଙ୍କୁ ଘୋଳଦହି ବି ଦେଇଥିଲେ । କଥାବାର୍ତ୍ତା, ଖିଆ ପିଆ ସାରି ଗୃହକୁ ସ୍ୱାଭାବିକ କରିବାକୁ ସବୁ ହଁ ହାଁ ମାରି କାଲି ଫେରିବା ପରେ ଆଜି ପୁଣି ବୁଲିପଡିଲେ ବିରୋଧୀ ବିଜେପି । ନବୀନଙ୍କ ଆଗରେ କାଲି ବାଧ୍ୟ ଶିଶୁ ପାଲଟିଥିବା ବିଜେପି ବିଧାୟକଙ୍କୁ ବିବେକ ବାଧା ଦେଲା ନା କଣ ଆଜି ପୁଣି ମନ୍ତ୍ରୀଙ୍କ ଉତ୍ତର ପରେ ଓଲଟିପଡି କାଲିର ନବୀନ ନିବାସ ଅଭିଯାନ ପାଇଁ ଅନୁତାପ କରିଛନ୍ତି ବିରୋଧୀ ବିଜେପି ।
ବିରୋଧୀ ଦଳ ନେତା ପ୍ରଦୀପ୍ତ ନାୟକ କହିଛନ୍ତି ନବୀନ ବାବୁଙ୍କ ଘରକୁ ଯିବାଟା ଆମର ଭୁଲ ଥିଲା । ଘରକୁ ଡାକି ନବୀନ ବାବୁ ଆମକୁ ଠକି ଦେଇଛନ୍ତି, ଆମ ସହ ପ୍ରତାରଣା କରିଛନ୍ତି । ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝି ବି ସମାନ କଥାକୁ ଦୋହରାଇଛନ୍ତି । ନବୀନ ନିବାସରେ ବିଜେପି ବିଧାୟକଙ୍କୁ ଅପମାନିତ କରିବା ପାଇଁ କାଲି ସୁଚିନ୍ତିତ ଷଡଯନ୍ତ୍ର ରଚାଯାଇଥିଲା ବୋଲି ମୋହନ ତୀର ମାରିଛନ୍ତି ।
ତେବେ ବିଜେପିର ଏ ସବୁ ଅନୁଶୋସନା ଭିତରେ କଟା ଘାରେ ଚୂନ ମାରିଛି କଂଗ୍ରେସ । ବିଜେପି- ବିଜେଡି ଭାଇ ଭାଇ କହି ଆସୁଥିବା କଂଗ୍ରେସକୁ ଆଉ ଟିକେ ସୁଯୋଗ ଦେଇଛି କାଲି ଏ ହାଇଡ୍ରାମା । କଂଗ୍ରେସର ଟାଣୁଆ ନେତ ତାରା ଓ ନରସିିଂହ ମିଶ୍ର କହିଛନ୍ତି ବିଜେପି ବାଲା କାଲି ବରଯାତ୍ରୀ ସାଜି ଯାଇଥିଲେ ଆଉ ନବୀନ କର୍ତ୍ତା ସାଜି ତାଙ୍କୁ ସିନ୍ଦୂର, ଚନ୍ଦନ ମାରି ପାଛୋଟି ନେଇଥିଲେ । ଯାହା ସେମାନଙ୍କ ଭିତିରି ସମ୍ପର୍କର କଥା ସ୍ପଷ୍ଟ କରୁଛି ବୋଲି କଂଗ୍ରେସ କହିଛି ।
ସେପଟେ ଏ ସବୁ ଭିତରେ ବିଚରା ମନ୍ତ୍ରୀ ପ୍ରତାପ ଜେନା ନିଜ ଟଙ୍ଗସ୍ଲିପ ପାଇଁ ଘାଣ୍ଟି ଦେଉଛନ୍ତି । ନବୀନ ନିବାସକୁ ନେଇ କାଲି ଯେଉଁ ପାପ ଧୁଆ ମନ୍ତବ୍ୟ ଦେଇଥିଲେ ଆଜି ତାହା ତାଙ୍କୁ ବୁମେରାଂ ସାଜିଛି । ବିଜେଡି ମୁଖିଆଙ୍କୁ ସିନା ଖୁସ କରିବାକୁ କାଲି କହୁ କହୁ ନବୀନ ନିବାସ ପବିତ୍ର ସ୍ଥାନ, ଏଠାକୁ ଆସି ବିରୋଧୀଙ୍କ ପାପ ଧୋଇଯିବ କହିଦେଇଥିଲେ । ହେଲେ ଆଜି ବିଧାନସଭା ସେଇ ମନ୍ତବ୍ୟ ପାଇଁ ପଡୁଛି ଉଠୁଛି । ଆମେ କଣ ପାପୀ, ପ୍ରତାପ ଜେନା ଆମକୁ ପାପୀ କହିଛନ୍ତି ବୋଲି ସିଧା ଅଭିଯୋଗ ଆଣି ବର୍ଷିଛନ୍ତି ବିରୋଧୀ ଦଳ ନେତା ପ୍ରଦୀପ୍ତ ନାୟକ । ତେବେ ସବୁ ଘଟଣାକ୍ରମକୁ ଲକ୍ଷ୍ୟ କଲେ ଗୋଟିଏ କଥା କୁହାଯାଇପାରେ, ସତରେ ଭୁଲ ହେଲା କି ନବୀନ ନିବାସ ଯିବା…?