Get real time updates directly on you device, subscribe now.
ମାନିଗଲେ କି ପ୍ରତିଭା ମହାରଥୀ? ଦୂର ହୋଇଯିବ କି ଅଭିମାନ, ପୁଅ ପାଇଁ ପିପିଲି ପଡିଆକୁ ଓହ୍ଲାଇବେ କି ମା? ଏଭଳି ଅନେକ ପ୍ରଶ୍ନ ସେତେବେଳେ ଉଠିଛି ଯେତେବେଳେ ପିପିଲି ପାଇଁ ବିଜେଡି ପ୍ରାର୍ଥୀ ଘୋଷଣା କରିଛି । ଦିବଙ୍ଗତ ବିଧାୟକ ପ୍ରଦୀପ ମହାରଥୀଙ୍କ ପୁଅ ରୁଦ୍ର ମହାରଥୀଙ୍କୁ ଦଳ ପିପିଲି ମୈଦାନକୁ ଓହ୍ଲାଇଛି । କିନ୍ତୁ ରୁଦ୍ରଙ୍କୁ ପ୍ରାର୍ଥୀ ଘୋଷଣା କରିବା ପରେ ପିପିଲି ପଲିଟକ୍ସକୁ ନେଇ ନାନାଦି କଳ୍ପନା ଜଳ୍ପନା ଆରମ୍ଭ ହୋଇଛି । ହଁ, ମହାରଥୀଙ୍କ ଦେହାନ୍ତ ପରେ ତାଙ୍କ ପରିବାରରୁ କାହାକୁ ଟିକେଟ ଦିଆଯାଉ ବୋଲି ପୂର୍ବରୁ ନିର୍ବାଚନମଣ୍ଡଳୀରେ ଦାବି ଜୋର ଧରିଥିଲା । ମହରଥୀଙ୍କ ପିପିଲି ଗଡ ସମ୍ଭାଳିବାକୁ ପତ୍ନୀ ପ୍ରତିଭା ଓ ପୁଅ ରୁଦ୍ରଙ୍କ ନାଁକୁ ନେଇ ଚର୍ଚ୍ଚା ଆରମ୍ଭ ହୋଇଥିଲା । ତେବେ ଟିକେଟ ରେସରେ ମା ପ୍ରତିଭା ମହାରଥୀଙ୍କ ପଲଟା ବେଶ ଭାରି ରହିଥିବା ନେଇ ରାଜନୈତିକ ମହଲରେ ଜୋରଦାର ଚର୍ଚ୍ଚା ହେଉଥିଲା । ଏପରିକି ମହାରଥୀଙ୍କ ଦେହାନ୍ତ ପରେ ପ୍ରତିଭାଙ୍କ ହାତରେ ଦଳ ପିପିଲି ଦାୟିତ୍ୱ ଦେବ ବୋଲି ଆକଳନ କରାଯାଉଥିଲା । ସୁପ୍ରିମୋଙ୍କ ପକ୍ଷରୁ ସବୁଜ ସଂକେତ ମିଳିନଥିଲେ ମଧ୍ୟ ପୁଅକୁ ଧରି ବିଭିନ୍ନ ପଞ୍ଚାୟତ ବୁଲି ସଙ୍ଗଠନର ଛାମୁଆ ନେତାଙ୍କୁ ଭେଟିଥିଲେ ପ୍ରତିଭା । ତେବେ ଏହାର କିଛି ଦିନ ମଧ୍ୟରେ ପିପିଲି ପଲିଟିକ୍ସ କଡ ଲେଉଟାଇବା ଆରମ୍ଭ କରିଥିଲେ । ଉଭୟ ମା ଓ ପୁଅଙ୍କ ପାଇଁ ସଙ୍ଗଠନ ଦୁଇଫାଳ ହୋଇଯାଇଥିଲା । କିଛି ନେତା ପ୍ରତିଭାଙ୍କ ପାଇଁ ଲବି କରିବା ଆରମ୍ଭ କରିଥିବା ବେଳେ ଆଉ କିଛି ମହାରଥୀଙ୍କ ଗଡ ସମ୍ଭାଳିବାକୁ ପୁଅ ରୁଦ୍ରଙ୍କୁ ଟିକେଟ ଦିଆଯାଉ ବୋଲି ବିଭିନ୍ନ ଫୋରମରେ ଦଳୀୟ ନେତାଙ୍କ ନିକଟରେ ଦାବି ରଖିଥିଲେ । ଆଉ ଶେଷରେ ଅନେକ ଆଲୋଚନା, କାଣ୍ଟଛାଣ୍ଟ ପରେ ରୁଦ୍ରଙ୍କ ନାଁରେ ମୋହର ମାରିଥିଲେ ଦଳର ସୁପ୍ରିମୋ ନବୀନ ପଟ୍ଟନାୟକ ।
ଆଉ ନବୀନଙ୍କ ଘୋଷଣା ସହ ପୁଣିଥରେ ସରଗରମ ହୋଇଛି ପିପିଲି ପଲିଟିକ୍ସ । କାରଣ ପୁଅ ରୁଦ୍ରଙ୍କୁ ଟିକେଟ ଦିଆଯିବା ପରେ ମା ପ୍ରତିଭାଙ୍କୁ ବୁଝାଇବାକୁ ବିଜେଡିର ବରିଷ୍ଠ ବ୍ରିଗେଡ ଯାଇଥିଲେ ମଧ୍ୟ ଫେଲ ମାରିଥିବା ନେଇ ଗଣମାଧ୍ୟମରେ ଖବର ବାଜିଲା । ଏପରିକି ରୁଦ୍ରଙ୍କୁ ନେଇ ମଧ୍ୟାହ୍ନରେ ମାଆ ପ୍ରତିଭା ପ୍ରେସମିଟରେ ପୂରା ପ୍ରତିକ୍ରିୟା ରଖିବେ ବୋଲି ଖବର ବିଜୁଳି ବେଗରେ ବ୍ୟାପିଲା । ତେଣୁ ରାଜନୀତିକୁ ଅତି ପାଖରୁ ଦେଖୁଥିବା ଲୋକେ ପ୍ରତିଭାଙ୍କ ମୁହଁରୁ ଜୁନିୟର ମହାରଥୀଙ୍କ ବାବଦରେ ଶୁଣିବାକୁ ଚାହିଁ ବସିଥିଲେ । ଏପରିକି ବିରୋଧୀ ଶିବିର ମଧ୍ୟ ପ୍ରତିଭାଙ୍କ ପଦିଏ କଥା ପାଇଁ ଅପେକ୍ଷାରତ ଥିଲେ । କାରଣ ପ୍ରେସମିଟରେ ପ୍ରତିଭାଙ୍କ ପ୍ରତିକ୍ରିୟା ପିପିଲି ଉପ-ନିର୍ବାଚନରେ ବଡ ପ୍ରଭାବ ପକାଇବାର ଯଥେଷ୍ଟ ସମ୍ଭାବନା ରହିଥିଲା ।
ସମୟ ବିତିଲା, ମଧ୍ୟାହ୍ନରୁ ଅପରାହ୍ନ ହେଲା । କିନ୍ତୁ ପ୍ରେସମିଟରେ ପଡିଲାନି ପ୍ରତିଭାଙ୍କ ପାଦ । ବରଂ ଯାହା କହିବାର ଅଛି ସିଧାସଳଖ ସନ୍ଧ୍ୟାରେ ପିପିଲିରେ କହିବି ବୋଲି କହିଥିଲେ ପ୍ରତିଭା । ଏପରିକି ପୁଅ କହିବା ବଦଳରେ ରୁଦ୍ର ମହାରଥୀଙ୍କ ପାଇଁ ଯାହା କହିବା କଥା ଫାର୍ମ ହାଉସରେ କହିବି ବୋଲି ମା ପ୍ରତିଭା କହିଥିଲେ । ଆଉ ଜଣେ ମାଙ୍କ ମୁହଁରୁ ଏଭଳି କଥାକୁ ନେଇ ଚର୍ଚ୍ଚା ହେଲା ଯେ, ରୁଦ୍ରଙ୍କୁ ଟିକେଟ ଦିଆଯିବା ନେଇ ଖୁସି ନାହାନ୍ତି ମା ପ୍ରତିଭା । କିନ୍ତୁ ସନ୍ଧ୍ୟାରେ ସବୁ ସ୍ପଷ୍ଟ କରିବାର ପ୍ରତିଶ୍ରୁତି ଦେଇ ମଧ୍ୟ ପ୍ରେସମିଟରେ ପହଞ୍ଚିନଥିଲେ ପ୍ରତିଭା । ଏପରିକି ଆମ ବ୍ୟାପିନି ପ୍ରତିନିଧି ପ୍ରତିଭାଙ୍କୁ ଯୋଗାଯୋଗ କରିବାକୁ ଚେଷ୍ଟା କରିଥିଲେ ମଧ୍ୟ ତାହା ସମ୍ଭବପର ହୋଇନଥିଲା । ତେବେ ଏଭଳି ଘଟଣାବଳୀ ଏବେ ଦର୍ଶାଉଛି ଯେ, ପ୍ରେସମିଟରେ ଯାହା କହିଥାନ୍ତେ ତାହା ବୋଧହୁଏ ମନ ଭିତରେ ଚାପିଦେଲେ ପ୍ରତିଭା । ପୁଅର ରାଜନୈତିକ ଭବିଷ୍ୟତକୁ ଦୃଷ୍ଟିରେ ରଖି ପ୍ରତିଭା ସାମ୍ପ୍ରତିକ ସମୟରେ ମୁହଁ ଖୋଲିବାକୁ ଶ୍ରେୟସ୍କର ବୋଲି ଭାବିଲେନି କି? ନା ପୁଅର ସୁରକ୍ଷିତ ଭବିଷ୍ୟତ ପାଇଁ ମାନିଗଲେ ମା । ତେବେ ଏହି ବାବଦରେ ସ୍ପଷ୍ଟ ଚିତ୍ର ମାର୍ଚ୍ଚ ୩୦ରେ ସାମ୍ନାକୁ ଆସିବ । କାରଣ ଉକ୍ତ ଦିନ ନାମାଙ୍କନ ଦାଖଲ କରିବେ ରୁଦ୍ର । ତେଣୁ ନାମାଙ୍କନ ଦାଖଲ ଦିନ ପୁଅ ରୁଦ୍ର ସହ ମା ଉପସ୍ଥିତ ରହୁଛନ୍ତି କି ନାହିଁ ତାହା ଦେଖିବା ବାକି ରହିଲା ।