Get real time updates directly on you device, subscribe now.
ବହୁ ଚର୍ଚ୍ଚିତ ଗ୍ୟାଙ୍ଗଷ୍ଟାର ହାଇଦର ଫେରାର୍କୁ ୩୬ ଘଣ୍ଟା ବିତି ସାରିଥିଲେ ମଧ୍ୟ ତା’ର ପତ୍ତା ପାଇନି କମିଶନରେଟ୍ ପୁଲିସ୍। ହାଇଦରକୁ ଧରିବାକୁ ପୁଲିସ ତନାଘନା ଚଳାଇଥିବା ବେଳେ ହାଇଦରର ମୁଖ୍ୟ ସହଯୋଗୀ କୁହାଯାଉଥିବା ୟାକୁବ୍ ଖାଁ ସରେଣ୍ଡର କରିଛି । କଟକ ଚାଉଳିଆଗଞ୍ଜ ଥାନାରେ ଆତ୍ମସମର୍ପଣ କରିଛି ୟାକୁବ୍ ଖାଁ ।
ବିଭିନ୍ନ ସ୍ଥାନରେ ପୁଲିସର ଚଢ଼ାଉ ପରେ ଚାପରେ ଆତ୍ମସମର୍ପଣ କଲା ୟାକୁବ୍ । । ୟାକୁବ କଟକ ବଡ଼ ମେଡିକାଲରେ ହାଇଦରକୁ ବାରମ୍ବାର ଭେଟି କାମଧନ୍ଦା ପାଇଁ କହିଥିଲା । ବାଲିଘାଟ ଓ ଠିକା କାମ ପାଇଁ ହାଇଦରକୁ ୟାକୁବ କହିଥିଲା । ସେହିପରି ମେଡିକାଲରେ ହାଇଦରକୁ ବିରିୟାନି ଖାଇବାକୁ ଦେଇଥିବା କଥା ମାନିଥିବା ବେଳେ ହାଇଦର ଫେରାର୍ ହେବା ନେଇ ସେ କିଛି ଜାଣି ନଥିବା କହିଛି । ୟାକୁବ କହିଛି, ସେ ଚାହେଁନି ତା ପରିବାର ତା ପାଇଁ ଅସୁବିଧାରେ ପଡୁ। ତେଣୁ ସେ ପୋଲିସଠାରେ ଆତ୍ମ ସମର୍ପଣ କରିଛି ।
ହାଇଦର ଫେରାର ହେବା ପରଠାରୁ ଓଡ଼ିଶା ପୋଲିସର ନିଦ ହଜିଯାଇଛି । ଫେରାର ଗ୍ୟାଙ୍ଗଷ୍ଟର ହାଇଦରକୁ ଧରିବା ପାଇଁ ଅପରେସନ ହାଇଦର ନାଁର ବଡ଼ ଅପରେସନ ଆରମ୍ଭ ହୋଇଛି । ସଡ଼କ ପଥରୁ ରେଳପଥ, ସୀମା ଅଞ୍ଚଳରୁ ପ୍ରମୁଖ ଛକ । ସବୁଠି ଯାଂଚ ଚାଲିଛି । ଏସସିବିର ନର୍ସଙ୍କ ବୟାନ ରେକର୍ଡ କରାଯିବା ପରେ ମେଡିକାଲ ସିସିଟିଭି ଯାଞ୍ଚ ହେଉଛି । ହାଇଦରକୁ ତୁରନ୍ତ ଗିରଫ କରିବା ପାଇଁ ଆବଶ୍ୟକ ପଦକ୍ଷେପ ନିଆଯାଉଛି । ସୁରକ୍ଷା ଦାୟିତ୍ବରେ ଥିବା ୬ଜଣ ପୋଲିସ କର୍ମଚାରୀଙ୍କୁ ସସପେଣ୍ଡ କରାଯାଇଛି । ଏମାନେ ସମସ୍ତେ ହାଇଦରର ସୁରକ୍ଷା ଦାୟିତ୍ବରେ ଥିଲେ ।