Get real time updates directly on you device, subscribe now.
କରୋନା ସଂକ୍ରମଣ ହୁ ହୁ ହୋଇ ବଢୁଥିବା ବେଳେ ଆସନ୍ତା ମେ ପହିଲାରୁ ୧୮ରୁ ୪୫ ବର୍ଷ ବୟସ୍କ ବ୍ୟକ୍ତିଙ୍କୁ ମାଗଣା ଟିକା ଦିଆଯିବ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଛନ୍ତି । ଅଥାର୍ତ କୋଭିଡ ଟିକା ପାଇଁ ଜନସାଧାରଣଙ୍କୁ ଟଙ୍କାଟିଏ ମଧ୍ୟ ଖର୍ଚ୍ଚ କରିବାକୁ ପଡିବନି । କିନ୍ତୁ ମେ ପହିଲାରୁ ଟିକାକରଣ ହୋଇପାରିବ କି ନାହିଁ ତାହାକୁ ନେଇ ଏବେ ଦ୍ୱନ୍ଦ୍ୱ ଦେଖାଦେଇଛି । ମେ ପହିଲାରୁ ନୁହେଁ ବରଂ ମେ ୩ରୁ ଏହି ମାଗଣା ଟିକାକରଣର ଶୁଭାରମ୍ଭ ହୋଇପାରେ । ଆଉ ଏହା ପଛର କାରଣ ହେଉଛି ରାଜ୍ୟ ସରକାର ଘୋଷଣା କରିଥିବା ସପ୍ତାହାନ୍ତ ସଟଡାଉନ ।
ଆସନ୍ତା ମେ ପହିଲା ଶନିବାରରେ ପଡୁଛି । ରାଜ୍ୟ ସରକାରଙ୍କ ଘୋଷଣା ଅନୁଯାୟୀ ଶନିବାର ରାଜ୍ୟର ସବୁ ସହରାଞ୍ଚଳରେ ସପ୍ତାହାନ୍ତ ସଟଡାଉନ ଜାରି ରହିବ । ତେଣୁ ଏହି ସମୟରେ ୧୮ରୁ ୪୫ ବର୍ଷ ବୟସ୍କ ପାଇଁ ମାଗଣା ଟିକାକରଣର ଶୁଭାରମ୍ଭ ହୋଇନପାରେ । କାରଣ ପୂର୍ବରୁ ରାଜ୍ୟ ସରକାରଙ୍କ ବିଭିନ୍ନ ଅଧିକାରୀ ସପ୍ତାହାନ୍ତ ସଟଡାଉନରେ ଟିକାକରଣ ହେବ ନାହିଁ ବୋଲି ସ୍ପଷ୍ଟ କରିଥିଲେ । ଶନି-ରବି ସଟଡାଉନରେ ଟିକାକରଣ କେନ୍ଦ୍ରକୁ ସାନିଟାଇଜ କରାଯିବ ବୋଲି କୁହାଯାଇଥିଲା । ଏପରିକି ପୂର୍ବ ସପ୍ତାହାନ୍ତ ସଟଡାଉନରେ ମଧ୍ୟ ଟିକାକରଣ କାର୍ଯ୍ୟକ୍ରମକୁ ବନ୍ଦ କରାଯାଇଥିଲା । ତେଣୁ ରାଜ୍ୟ ସରକାରଙ୍କ ଅଧିକାରୀଙ୍କ ବୟାନକୁ ବିଚାରକୁ ନେଲେ ଆସନ୍ତା ଶନି-ରବିବାରରେ ଟିକାକରଣ କାର୍ଯ୍ୟକ୍ରମ ସମ୍ଭବ ନୁହେଁ । ଅଥାର୍ତ ମେ ୧ ଓ ୨ରେ ସପ୍ତାହାନ୍ତ ସଟଡାଉନ ଯୋଗୁଁ ଟିକାକରଣ ହେବା ସମ୍ଭବ ନୁହେଁ । ତେଣୁ ମେ ୩ରୁ ରାଜ୍ୟ ସରକାରଙ୍କ ପକ୍ଷରୁ ଘୋଷଣା ହୋଇଥିବା ମାଗଣା ଟିକାକରଣ କାର୍ଯ୍ୟକ୍ରମର ଶୁଭାରମ୍ଭ ହୋଇପାରେ । ତେବେ ଏନେଇ ସରକାରଙ୍କ ପକ୍ଷରୁ କୌଣସି ନିର୍ଦ୍ଦିଷ୍ଟ ସୂଚନା ଏଯାଏଁ ମିଳିପାରିନାହିଁ । ଯେଉଁଥିପାଇଁ ଲୋକଙ୍କ ମନରେ ଟିକିଏ ଦ୍ୱନ୍ଦ୍ୱ ଉପୁଜୁଛି ।
ଏସବୁ ଭିତରେ ୧୮ରୁ ୪୫ ବର୍ଷ ବୟସ୍କଙ୍କ ଟିକାକରଣ ପାଇଁ ସରକାର ୱେବ ପୋର୍ଟାଲରେ ପଞ୍ଜୀକରଣ ବ୍ୟବସ୍ଥା କରିଛନ୍ତି । ୨୮ ଏପ୍ରିଲରୁ କୋ-ୱିନ୍ ପୋର୍ଟାଲରେ ପଞ୍ଜୀକରଣ କରିପାରିବେ । ଥରେ ପଞ୍ଜୀକରଣ କରିବା ପରେ ମୋବାଇଲକୁ ଟିକାକରଣ ବାବଦରେ ସମସ୍ତ ସୂଚନା ଆସିବ । କେଉଁଠି ଟିକା ନେବେ ଓ କେବେ ନେବେ ସେ ବାବଦରେ ବିଶଦ ଭାବରେ ସୂଚନା ପାଇପାରିବେ ଲୋକେ । ସବୁଠୁ ଗୁରୁତ୍ୱପୂର୍ଣ୍ଣ କଥା ହେଲା, କେବଳ ବେସରକାରୀ ଟିକାକରଣ କେନ୍ଦ୍ରରେ ହିଁ ୧୮ରୁ ୪୫ ବର୍ଷୀୟ ବ୍ୟକ୍ତିଙ୍କୁ ଏହି ସୁବିଧା ମିଳିବ । କୌଣସି ସରକାରୀ ଟିକାକରଣ କେନ୍ଦ୍ରରେ ଏହି ବର୍ଗର ବ୍ୟକ୍ତିଙ୍କୁ ଟିକା ଦିଆଯିବ ନାହିଁ ।
ଅନ୍ୟପଟେ ୪୫ ବର୍ଷରୁ ଅଧିକ ବୟସ୍କ ବ୍ୟକ୍ତିଙ୍କ କ୍ଷେତ୍ରରେ ପୂର୍ବଭଳି ସରକାରୀ ଟିକାକରଣ କେନ୍ଦ୍ରରେ ମାଗଣା ଟିକାକରଣ ବ୍ୟବସ୍ଥା ଜାରି ରହିବ । ପ୍ରଥମ ଡୋଜ ବେସରକାରୀ ଟିକାକରଣ କେନ୍ଦ୍ରରେ ନେଇଥିଲେ ମଧ୍ୟ ଦ୍ୱିତୀୟ ଡୋଜ ସରକାରୀ ଟିକାକରଣ କେନ୍ଦ୍ରରେ ନେଇପାରିବେ । କିନ୍ତୁ ଏହି ବର୍ଗର ଲୋକଙ୍କ ମଧ୍ୟରୁ ଯଦି କେହି ବେସରକାରୀ ଟିକାକରଣ କେନ୍ଦ୍ରରେ ଟିକା ନେବାକୁ ଚାହୁଁଥାନ୍ତି ତେବେ ଏଥିପାଇଁ ତାଙ୍କୁ ଟିକା କିଣିବାକୁ ପଡିବ । ଦୁଇଟି ଟିକା ପାଇଁ ଯେଉଁ ଦର ଧାର୍ଯ୍ୟ ହୋଇଛି ସେହି ମୂଲ୍ୟ ଦେଇ ଟିକା ନେଇପାରିବେ । ସେହିଭଳି କୋଭିଡ ଟିକା ନେବା ପରେ ଯଦି କେହି ପଜିଟିଭ ଚିହ୍ନଟ ହୁଅନ୍ତି ତେବେ ସଂକ୍ରମଣରୁ ସୁସ୍ଥ ହେବାର ୪ ସପ୍ତାହ ପରେ ପୁଣିଥରେ ଟିକା ନେଇପାରିବେ ।