ଭୁବନେଶ୍ୱର: ଅସୁସ୍ଥତା କାରଣରୁ ଭୁବନେଶ୍ୱରର ଏକ ଘରୋଇ ଡାକ୍ତରଖାନାରେ ଚିକିତ୍ସିତ ହେଉଥିବା ବିଶିଷ୍ଟ କଣ୍ଠଶିଳ୍ପୀ ପ୍ରଣବ ପଟ୍ଟନାୟକ ସୁସ୍ଥ ହୋଇ ଘରକୁ ଫେରିଛନ୍ତି । ପାଞ୍ଚ ଦଶନ୍ଧିରୁ ଅଧିକ ସମୟ ଧରି ଓଡିଆ ଇଣ୍ଡଷ୍ଟ୍ରିରେ ପ୍ରାଧାନ୍ୟ ବିସ୍ତାର କରିଥିବା ପ୍ରଣବ ପଟ୍ଟନାୟକ ଜାନୁୟାରୀ ୨୦, ୧୯୩୮ ରେ କଟକରେ ଜନ୍ମ ହୋଇଥିଲେ । ତାଙ୍କ ପିତା ସ୍ୱର୍ଗତ ଲାଲ ମୋହନ ପଟ୍ଟନାୟକ (ଓଡିଶା ବିଧାନସଭାର ପୂର୍ବତନ ବାଚସ୍ପତି) ଙ୍କ ଦ୍ୱାରା ଅନୁପ୍ରାଣିତ ହୋଇ ସଙ୍ଗୀତ ଜଗତରେ ପାଦଥାପି ଥିଲେ ପ୍ରଣବ । ସେ ଓଡ଼ିଶୀ, ଲୋକଗୀତ, ଭକ୍ତ ଏବଂ ଭଜନ, ସେମି କ୍ଲାସିକାଲ୍, ପାରମ୍ପାରିକ, ହିନ୍ଦୀ ଗୀତ ଏବଂ ଗଜଲ୍ ଇତ୍ୟାଦି ସଂଗୀତର ବିଭିନ୍ନ ବିଭାଗରେ ସ୍ୱର ଦେଇଛନ୍ତି । ୧୯୫୮ ମସିହାରେ, ସେ “ମା” ଚଳଚ୍ଚିତ୍ର ଜରିଆରେ ପ୍ରଥମ ଥର ପାଇଁ ପ୍ରଚ୍ଛଦପଟ୍ଟ ଗାୟକ ଭାବରେ ତାଙ୍କର ସଙ୍ଗୀତ କ୍ୟାରିଅର୍ ଆରମ୍ଭ କରିଥିଲେ ।
ସେ ହେମଲତା, ଭାଣୀ ଜୟରାମ, ଏସ୍ ଜାନକୀ, ପି ସୁଶୀଲା, ନିର୍ମଲ ମିଶ୍ର, ଭୁପିନ୍ଦର ସିଂ, ଉଷା ମଙ୍ଗେଶକର ଏବଂ ହସ୍ୱମନ୍ତୀ ସୁକଲାଙ୍କ ପରି ଜଣାଶୁଣା ଗାୟକମାନଙ୍କ ସହ ଗୀତ ଗାଇବାର ସୁଯୋଗ ପାଇଥିଲେ । ସେ ହେଉଛନ୍ତି ଏକମାତ୍ର ଓଡିଆ ପ୍ଲେବ୍ୟାକ୍ ଗାୟକ ଯିଏକି ସାତଥର ଓଡ଼ିଶା ସରକାରଙ୍କ ଦ୍ୱାରା “ବେଷ୍ଟ ପ୍ଲେବ୍ୟାକ୍ ଗାୟକ ପୁରସ୍କାର” ସହିତ ସମ୍ମାନିତ ହୋଇଛନ୍ତି । ସେ ଓଡିଶାର ପ୍ରାୟ ସମସ୍ତ ସଙ୍ଗୀତ ନିର୍ଦ୍ଦେଶକଙ୍କ ବ୍ୟାନରରେ ୨୦୦ ରୁ ଅଧିକ ଓଡିଆ ଚଳଚ୍ଚିତ୍ର ରେ କଣ୍ଠଦାନ କରିଛନ୍ତି ।
ଅସୁସ୍ଥ ଥିବା ସମୟରେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ଏକ ପ୍ରତିନିଧି ଦଳ ବିଶିଷ୍ଟ କଣ୍ଠଶିଳ୍ପୀ ପ୍ରଣବ ପଟ୍ଟନାୟକଙ୍କୁ ସାକ୍ଷାତ କରି ଚିକିତ୍ସା ସହାୟତା ପାଇଁ ପରିବାର ସଦସ୍ୟଙ୍କୁ ଏକ ଲକ୍ଷ ଟଙ୍କାର ଏକ ଚେକ ପ୍ରଦାନ କରିଥିଲେ ।