Get real time updates directly on you device, subscribe now.
ଟଙ୍କା ଖର୍ଚ୍ଚ କରି ନିର୍ବାଚନ ଜିତିଛି, ସେଥିପାଇଁ ପାଞ୍ଚ ବର୍ଷ ଯାଏଁ ଲୋକଙ୍କ କଲ୍ୟାଣ ପାଇଁ ଆସୁଥିବା ଟଙ୍କା ନିଜେ ତଥା ନିଜର କିଛି ଚାମଚା ମିଶି ହରିଲୁଟ କରିବୁ । ସର୍ବସମ୍ମୁଖରେ ଏମିତି ଦମ୍ଭକ୍ତି ରଖିଛନ୍ତି ଜଣେ କୁଜି ନେତା । ଲୋକଙ୍କ ସ୍ୱାର୍ଥକୁ ପଛରେ ପକାଇ ଦିନ ଦିପହରରେ କରିଚାଲିଛନ୍ତି ଦୁର୍ନୀତି । ଏମିତି ଘଟଣା ଦେଖିବାକୁ ମିଳିଛି ଖୋଦ ରାଜଧାନୀ ଉପକଣ୍ଠରେ ଥିବା ଜୟଦେବ ନିର୍ବାଚନ ମଣ୍ଡଳୀ ଅନ୍ତର୍ଗତ ଆମଣକୁଦ ପଞ୍ଚାୟତରେ ।
ବ୍ୟାପିନୀକୁ ମିଳିଥିବା ସୂଚନା ଅନୁସାରେ ୨୦୧୭ ପଞ୍ଚାୟତ ନିର୍ବାଚନରେ ଏହି ଆମଣକୁଦ ପଞ୍ଚାୟତବାସୀ ଜଣେ ସ୍ୱାଧୀନ ପ୍ରାର୍ଥୀଙ୍କ ଉପରେ ଆସ୍ଥା ପ୍ରକଟ କରିଥିଲେ । କାରଣ ସେମାନେ ଭାବିଥିଲେ ଯେ ଦଳୀୟ ରାଜନୀତିରୁ ଉର୍ଦ୍ଧ୍ବରେ ରହି ନିଜ ଅଂଚଳର ବିକାଶ କରିବେ ଏହି ସରପଞ୍ଚ । ଏହାରି ଭିତରେ ନିର୍ବାଚନକୁ ପାଞ୍ଚ ବର୍ଷ ପୁରିବାକୁ ଯାଉଛି । ଏପରିକି ପୁଣି ଥରେ ପଞ୍ଚାୟତ ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ ହେଇଗଲାଣି । କିନ୍ତୁ ବାବୁ ସରପଞ୍ଚ ଅଞ୍ଚଳର ଉନ୍ନତି କରିବା ଦୁରର କଥା, ଦୁର୍ନୀତିର ଗନ୍ତାଘର ପଲଟିଗଲେଣି । ଆଉ ଏଥିରେ ତାଙ୍କୁ ସହଯୋଗ କରୁଛନ୍ତି ସ୍ଥାନୀୟ ଜଣେ ମହିଳା ପ୍ରଶାସନିକ ଅଧିକାରୀ । ଆରଟିଆଇ ଜରିଆରେ ମିଳିଥିବା ତଥ୍ୟ ଅନୁସାରେ, ମନରେଗା ଠାରୁ ଆରମ୍ଭ କରି ନଳକୂପ ଖନନ ଓ ଫନି ବାତ୍ୟା ସହାୟତା ଠାରୁ ଆରମ୍ଭ କରି କୋଭିଡ ପରିଚାଳନା ସବୁଥିରେ ବିପୁଳ ପରିମାଣର ସରକାରୀ ସହାୟତାକୁ ଆତ୍ମସାତ କରାଯାଇଛି । ନିଜେ ସରପଞ୍ଚ ନିଜର କିଛି ଅନୁଗତଙ୍କ ସହାୟତାରେ ବ୍ୟାପକ ଫଲସ ବିଲ କରି ସରକାରୀ ଟଙ୍କାକୁ ହରଣଚାଳ କରିଛନ୍ତି । ଆଉ କୁହାଯାଉଛି ବ୍ଲକ ଅଫିସରେ ଥିବା ଜଣେ ମହିଳା ପ୍ରଶାସନିକ ଅଧିକାରୀ ହେଉଛନ୍ତି ଏହାର ମୁଖ୍ୟ କାର୍ପଟଦାର । ବଡ ଧରଣର ପିସି ନେଇ ସେ ଏହି ଦୁର୍ନୀତିକୁ ପ୍ରଶ୍ରୟ ଦେଇଛନ୍ତି ।
ବ୍ୟାପୀନି ପ୍ରତିନିଧି ଆହୁରି ମଧ୍ୟ ଜାଣିବାକୁ ପାଇଛନ୍ତି ଯେ, ସମ୍ପୃକ୍ତ ସରପଞ୍ଚ ଏବେ ବିରୋଧୀ ବିଜେପି କ୍ୟାମ୍ପ ସହ ହାତ ମିଳାଇଛନ୍ତି । ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କ ଏକାନ୍ତ ଘନିଷ୍ଠ ବୋଲି ଦାବି କରି ଦାଦାଗିରି କରିବାକୁ ମଧ୍ୟ ପଛଘୁଞ୍ଚା ଦେଉନାହାନ୍ତି । ସ୍ଥାନୀୟ ଜନସାଧାରଣଙ୍କ ଅଭିଯୋଗ ଶୁଣିବା ତ ଦୂର କଥା, ବିଧାୟକ ଅରବିନ୍ଦ ଢାଲିଙ୍କୁ ମଧ୍ୟ ଖାତିର କରୁନାହାନ୍ତି । ପଞ୍ଚାୟତର ସମସ୍ତ ଉନ୍ନତିମୂଳକ କାମ ଠପ ହେଇଯିବା ସହ ବ୍ୟାପକ ଦୁର୍ନୀତି ଦେଖି ଅଞ୍ଚଳବାସୀଙ୍କ ପାଇଁ ଏବେ ବାର ଦୁଆର ଶୁଣ୍ଢି ପିଣ୍ଡା ହେବା ଛଡା ଆଉ କିଛି ଉପାୟ ନାହିଁ । ବିଧାୟକଙ୍କ ଠାରୁ ଆରମ୍ଭ କରି ବିଭିନ୍ନ ବିଭାଗର ମନ୍ତ୍ରୀଙ୍କୁ ଅଭିଯୋଗ କଲେ ମଧ୍ୟ ଦୀପ ତଳ ଅନ୍ଧାର ପରି ଦୁର୍ନୀତିରେ ଉବୁଟୁବୁ ହେଉଛି ରାଜଧାନୀର ଅନତି ଦୂରରେ ଥିବା ଏହି ପଞ୍ଚାୟତ ।
ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଯେ ସରପଞ୍ଚ ସିଧା ସଳଖ କହୁଛନ୍ତି ଖର୍ଚ୍ଚ କରି ଜିତିଛି ତେଣୁ ଖାଇବି । କୋଭିଡ ମହାମାରୀ ସମୟରେ ଜଣେ ଲୋକପ୍ରତିନିଧିଙ୍କର ଏହି କେଲେଙ୍କାରୀ ସରକାରଙ୍କ ଦୃଷ୍ଟି ଆଢୁଆଳରେ ରହିଯାଉଛି । ସମସ୍ତ ପ୍ରକାର ଅଭିଯୋଗ ସତ୍ତ୍ୱେ କୌଣସି ସୁଫଳ ନମିଳିବାରୁ ଲୋକ ଏବେ ୫ଟି ଉପରୁ ମଧ୍ୟ ଆସ୍ଥା ହରେଇବାକୁ ବସିଲେଣି ।
ଆମଣକୁଦ ପଞ୍ଚାୟତବାସୀଙ୍କ ମନରେ ଏବେ ଯେଉଁ ସବୁ ପ୍ରଶ୍ନ ଉଙ୍କିମାରୁଛି,ସେଗୁଡିକ ହେଲା, ମହାତ୍ମାଗାନ୍ଧୀ ନିଶ୍ଚିତ କର୍ମନିଯୁକ୍ତି ଯୋଜନାରେ କେତେ ମିଥ୍ୟା ବିଲ କରି ଟଙ୍କା ହଡପ କରାଯାଇଛି ? ଫନି ବାତ୍ୟାର ଅନୁଦାନ କ୍ଷତିଗ୍ରସ୍ତଙ୍କ ପାଖରେ ନପହଂଚି ଗଲା କୁଆଡେ ? ବିଦ୍ୟୁତୀକରଣ ପାଇଁ ଆସିଥିବା ସହାୟତା ଟଙ୍କା ବିଲ ହୋଇଥିବା ବେଳେ ଲାଇଟ ବ୍ୟବସ୍ଥା କାହିଁକି ହେଇନି ? ରାଜ୍ୟ ସରକାର କୋଭିଡ ମୁକାବିଲା ପାଇଁ ଦେଇଥିବା ସହାୟତାକୁ ଖାଇଲା କିଏ ? ନଳକୂପ ପାଇଁ ଆସିଥିବା ଟଙ୍କା ଉଠାଯାଇଥିବା ବେଳେ କାମ କାହିଁକି ହେଇନି ? ଏମିତି କିଛି ଅସମାହିତ ପ୍ରଶ୍ନ ସମ୍ପୃକ୍ତ ପଞ୍ଚାୟତରେ କେତେ ଯେ ଦୁର୍ନିତୀ ହେଇଛି ତାହାକୁ ଅନୁମାନ କରିବାକୁ ଯଥେଷ୍ଟ । ଏବେ ତୁରନ୍ତ ସରକାର ଏହାର ତଦନ୍ତ କରି କୋଟି କୋଟି ଟଙ୍କାର ଏହି ଦୁର୍ନୀତିର ପର୍ଦାଫାଶ କରିବାକୁ ଓ ଦୋଷୀଙ୍କୁ ଉପଯୁକ୍ତ ଦଣ୍ଡ ବିଧାନ କରିବାକୁ ସ୍ଥାନୀୟ ବାସିନ୍ଦା ଦାବି କରିଛନ୍ତି ।