Get real time updates directly on you device, subscribe now.
ବିଜୁ ଯୁବ ଜନତା ଦଳର କାର୍ଯ୍ୟକାରିଣୀରେ ଯୋଗଦେଇ ରାଜନୀତିର ଏଭଳି କିଛି କାର୍ଡ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଖେଳିଛନ୍ତି ଯାହା ଆଗାମୀ ରାଜନୈତିକ ଅଧ୍ୟାୟକୁ ରୋଚକ କରିବାକୁ ଯାଉଛି । ପ୍ରଥମ ଥର ପାଇଁ ସ୍ୱତନ୍ତ୍ର ଓଡିଶା ପ୍ରଦେଶ ଗଠନ ଏବଂ ଓଡିଆ ଭାଷା, ସଂସ୍କୃତି ଐତିହ୍ୟକୁ ନେଇ ନବୀନ ଯେଉଁ ବୟାନ ରଖିଛନ୍ତି ତାହା ରାଜ୍ୟ ରାଜଧାନୀରୁ ଜାତୀୟ ରାଜଧାନୀ ଯାଏଁ କମ୍ପନ ସୃଷ୍ଟି କରିବାକୁ ଯାଉଛି । ହିନ୍ଦୀ ଭାଷାକୁ ଲଦିଦେବାକୁ ନେଇ ଯେଉଁ ବିବାଦ ତିଆରି ହୋଇଥିଲା, ସେଥିରେ ଆଜି ଏଂଟ୍ରୀ ମାରିଛନ୍ତି ବିଜେଡି ସୁପ୍ରିମୋ । ନବୀନ କହିଛନ୍ତି, ଜାତୀୟ ଦଳଙ୍କର ମୁଖ୍ୟ ଉଦ୍ଦେଶ୍ୟ ହେଉଛି ଗୋଟିଏ ଭାଷା ଗୋଟିଏ ସଂସ୍କୃତିକୁ ଲଦିଦେବା । ଏହା ଜରିଆରେ ହିଁ ସେମାନେ ଅଧିକ ଭୋଟ ପାଇପାରିବେ । ଏଥିରୁ ଗୋଟିଏ କଥା ସ୍ପଷ୍ଟ ଓଡିଆ ଭାଷା ଆଉ ସ୍ୱତନ୍ତ୍ର ଓଡିଶାର ପରିଚୟ ହିଁ ହେବ ଆଗାମୀ ଦିନରେ ବିଜେଡି ରାଜନୀତିର ମୁଳମୁଦ୍ଦା ।
ନିଜ ଅଭିଭାଷଣରେ ନବୀନ କହିଥିଲେ, ଯୁବଶକ୍ତି ରାଷ୍ଟ୍ରର ସବୁଠାରୁ ବଡ ସଂପତ୍ତି । ଓଡିଶା ଅନନ୍ୟ ଆଉ ଅସାଧାରଣ । ଦେଶର ପ୍ରଥମ ଭାଷାଭିତ୍ତିିକ ରାଜ୍ୟ । ଓଡିଶାର ଭାଷା, ସଂସ୍କୃତି ଐତିହ୍ୟ ମଧ୍ୟ ଅସାଧାରଣ । ମହାନଦୀ ଆମ ଜୀବନରେଖା । ମହାନଦୀର ପାଣି ପ୍ରତି ଓଡିଆଙ୍କ ପାଇ ଅଶୀର୍ବାଦ ହୋଇ ବହି ଚାଲିଛି । ରାଜ୍ୟ ପ୍ରଚୁର ଖଣିଜ ସଂପଦରେ ଭରପୁର । ସମୃଦ୍ଧ ଆଦିବାସୀ ସଂସ୍କୃତି ଆମର ଶକ୍ତି । ଓଡିଶାର ଏକ ସ୍ୱତନ୍ତ୍ର ପରିଚୟ ହୋଇ ଏହା ରହିଛି । ଓଡିଶାର ଏହି ଅନନ୍ୟ ସଂସ୍କୃତିର ସୁରକ୍ଷା ପାଇଁ ଆମର ପୂର୍ବ ପୁରୁଷ ଅନେକ ତ୍ୟାଗ କରିଛନ୍ତି । ଆମ ପାଇଁ ଲଢେଇ କରି ଆମକୁ ସ୍ୱତନ୍ତ୍ର ରାଜ୍ୟ ଦେଇଛନ୍ତି ।
ନିଜ ଅଭିଭାଷଣରେ ଜାତୀୟ ଦଳ ଗୁଡିକୁ ଟାର୍ଗେଟ କରି ନବୀନ କହିଛନ୍ତି, ଜାତୀୟ ଦଳର ମୁଖ୍ୟ ଲକ୍ଷ୍ୟ କଣ? ନିର୍ବାଚନ ଜିତିବା, କ୍ଷମତା ଅଧିକାର କରିବା ଏବଂ କେନ୍ଦ୍ରରେ ସରକାର କରିବା । ଜାତୀୟ ଦଳର ରାଜ୍ୟ ନେତା ମୁଖ୍ୟ ଲକ୍ଷ୍ୟ କଣ? ଜାତୀୟ ଦଳର ରାଜ୍ୟ ନେତୃତ୍ୱଙ୍କ ମୁଳ ଲକ୍ଷ୍ୟ ହେଲା, ଜାତୀୟ ନେତାଙ୍କୁ ଖୁସି କରିବା ଏବଂ ମନ୍ତ୍ରୀ ହେବା ସହ କିଛି ବଡ ପଦ ପଦବୀ ପାଇବା । ଇତିହାସ ଅଛି, ଜାତୀୟ ଦଳ ଗୁଡିକର ମୁଖ୍ୟ ଲକ୍ଷ୍ୟ ହେଉଛି, ଗୋଟିଏ ଭାଷା ହିନ୍ଦୀ, ଗୋଟିଏ ସଂସ୍କୃତି ଗୋଟିଏ ନୀତି । ଯାହାକି ବଡ ବଡ ରାଜ୍ୟ ମାନଙ୍କ ପାଇଁ ସୁବିଧା ହେବ । ଏହା ଜରିଆରେ ହିଁ ସେମାନେ ଅଧିକ ଭୋଟ ପାଇପାରିବେ । ଏହାପରେ ସେମାନେ ଅନ୍ୟ ରାଜ୍ୟ ମାନଙ୍କର ସ୍ୱତନ୍ତ୍ର ପରିଚୟକୁ ଅଣଦେଖା କରିବା ସହ ସେହି ନୀତିକୁ ଅନ୍ୟମାନଙ୍କ ଉପରେ ଲଦିଦେଇଥାନ୍ତି । ନିଜ ସ୍ୱାର୍ଥ ପାଇଁ ରାଜ୍ୟ ମାନଙ୍କର ସ୍ୱତନ୍ତ୍ର ଆବଶ୍ୟକତାରେ ସାଲିସ୍ କରିଥାନ୍ତି ଜାତୀୟ ଦଳ ।
ନବୀନ କହିଥିଲେ, ଆମ ଭାଷା ଓଡିଆ ହିନ୍ଦୀ ଠାରୁ ଅଧିକ ଗୁରୁତ୍ୱପୂର୍ଣ୍ଣ । ମହାନଦୀ ଅନ୍ୟ ନଦୀ ଠାରୁ ଅଧିକ ପବିତ୍ର । ଆମ ପାଇଁ ଓଡିଶୀ ସଂଗୀତ ସହ ଆମ ଆଦିବାସୀଙ୍କର ସମୃଦ୍ଧ ବିବିଧତା ଆମର ଶକ୍ତି । ଆମ ପାଇଁ ସମ୍ବଲପୁରୀ ବସ୍ତ୍ରାଳୟ ବିଶ୍ୱସ୍ତରୀୟ । ଗୋଟିଏ ଜାତୀୟ ଦଳ ପାଇଁ ଏହାର ମୁଲ୍ୟ କିଛି ନାହିଁ । ଆମ ଐତିହ୍ୟ ସୁରକ୍ଷା ପାଇଁ ଜାତୀୟ ଦଳର ରାଜ୍ୟ ନେତା ଚାହୁଁନାହାନ୍ତି । ଜାତୀୟ ଦଳରେ ଏହି ବିଷୟ ଉଠାଇବା ପାଇଁ ସମର୍ଥ ବି ହେଉନାହାନ୍ତି । ଅତୀତରେ ରିମୋଟ କଂଟ୍ରୋଲ ଦ୍ୱାରା କଂଗ୍ରେସ ଚାଲୁଥିଲା ଆଉ ଏବେ ବିଜେପି ଶାସିତ ରାଜ୍ୟ ମଧ୍ୟ ଜାତୀୟ ନେତାଙ୍କ ନିର୍ଦ୍ଦେଶ ମାନୁଛନ୍ତି । ଆଂଚଳିକ ଦଳ ଦ୍ୱାରା ସଶକ୍ତ ଓଡିଶାର ପରିକଳ୍ପନା କରାଯାଇପାରିବ ବୋଲି ନବୀନ ଉଲ୍ଲେଖ କରିଥିଲେ ।
ନିଜ ଅଭିଭାଷଣରେ ନବୀନ କହିଥିଲେ, ଦିଲ୍ଲୀରେ ଆମର କେହି ବସ୍ ନାହାନ୍ତି । ଓଡିଶା ବାସୀ ହେଉଛନ୍ତି ଆମର ବସ୍ । ଆମେ କେବଳ ଓଡିଶାବସୀଙ୍କ ପାଇଁ କାର୍ଯ୍ୟ କରୁଛୁ ଏବଂ ସେମାନଙ୍କର ଅଧିକାର ପାଇଁ ଲଢୁଛୁ । ମହାନଦୀ ପାଣି ପାଇଁ ବିଜେଡି ଲଢୁଛି । କୋଶଳି ଭାଷାକୁ ସମ୍ବିଧାନର ଅଷ୍ଟମ ଅନୁଛେଦରେ ସାମିଲ କରିବାକୁ ଲଢେଇ କରୁଛୁ । ଖଣିଜ ସଂପଦର ଲାଭ କିଭଳି ଓଡିଶା ଏବଂ ଓଡିଶାବାସୀ ପାଇବେ ସେଥିପାଇଁ ଅମେ ଲଢେଇ କରୁଛୁ । ଉଭୟ ଜାତୀୟ ଦଳ ବିଜେପି ଓ କଂଗ୍ରେସ ସେମାନଙ୍କର ନିର୍ବାଚନୀ ଇସ୍ତାହରରେ ସ୍ୱତନ୍ତ୍ର ରାଜ୍ୟ ମାନ୍ୟତାକୁ ୧ ନମ୍ବରରେ ରଖିଥିଲେ । ହେଲେ ନିର୍ବାଚନ ପରେ ଏହାକୁ ସହଜରେ ଭୁଲିଗଲେ । ବିଜେଡି ଏଥିପାଇଁ ଲଢେଇ ଜାରି ରଖିବ । ଓଡିଶା ପ୍ରତି କେନ୍ଦ୍ରର ବୈମାତୃକ ଆଚରଣ ସବୁବେଳେ ଉଠାଇବ ।
ଯୁବ ଜନତା ଦଳକୁ ଉଦବୋଧନ ଦେଇ ନବୀନ କହିଥିଲେ, ଗୋଟିଏ ସ୍ୱତନ୍ତ୍ର ରାଜ୍ୟ ଗଠନର ମୁଳ ଲକ୍ଷ୍ୟ ହେଉଛି ଆମ ସ୍ୱତନ୍ତ୍ରତାର ସୁରକ୍ଷା ଓ ଲୋକଙ୍କ ସୁରକ୍ଷା । ଗୋଟିଏ ଆଂଚଳିକ ଦଳ ହିଁ ରାଜ୍ୟର ଲୋକଙ୍କ ପାଇଁ ଲଢେଇ କରେ । ବିଜେଡି ଏକ ଆଂଚଳିକ ଦଳ ଭାବେ ସ୍ୱତନ୍ତ୍ର ଓଡିଶା ଗଠନର ଆଦର୍ଶର ପ୍ରତୀକ ହୋଇଯାଇଛି । ଏହି ବାର୍ତ୍ତାକୁ ସମସ୍ତଙ୍କୁ ମନେ ରଖୀବାକୁ ଆହ୍ୱାନ ଦେଇ ବିଜେଡି ସୁପ୍ରିମୋ କହିଥିଲେ, ଜାତୀୟ ଦଳଙ୍କ ପାଇଁ ଯୁବ ସମାଜର ଆବଶ୍ୟକତା ଗୈାଣ ହୋଇଯାଏ । ଆଉ ଆଂଚଳିକ ଦଳ ହିଁ ସେମାନଙ୍କର ଆବଶ୍ୟକତକୁ ବୁଝି ପୁରଣ କରିଥାନ୍ତି ।
ବଡ କଥା ହେଉଛି, ନବୀନ ନିଜର ଏହି ଅଭିଭାଷଣରେ ଆଗାମୀ ରାଜନୈତିକ ସ୍ଥିତିର ଯେଉଁ ମୁଳଦୁଆ ପକାଇଛନ୍ତି, ତାହା ଭାଷା ରାଜନୀତି, ଜାତୀୟ ଦଳ ବିରୁଦ୍ଧରେ ରଣହୁଙ୍କାର ଭଳି ଦିଗକୁ ସାମ୍ନାକୁ ଆଣୁଛି ।