Get real time updates directly on you device, subscribe now.
ନୁଆବର୍ଷକୁ ସ୍ୱାଗତ କରିବାକୁ ସମସ୍ତେ ପ୍ରସ୍ତୁତ ଥିବା ବେଳେ ରାଜ୍ୟ ସରକାର ସାରା ରାଜ୍ୟରେ ନାଇଟ କର୍ଫ୍ୟୁ ଲାଗୁ କରିଛନ୍ତି । ଏସଆରସି ପ୍ରଦୀପ ଜେନା ଏନେଇ ସୂଚନା ଦେଇଛନ୍ତି । ଆଜି ରାତି ୧୦ଟାରୁ ଆସନ୍ତାକାଲି ସକାଳ ୫ଟା ଯାଏଁ ଏହି କର୍ଫ୍ୟୁ ବଳବତ୍ତର ରହିବ । ଅର୍ଥାତ୍ ଜିରୋ ନାଇଟ ସେଲିବ୍ରେସନ ଏବଂ ନୁଆବର୍ଷକୁ ସ୍ୱାଗତ କରିବାକୁ ଯେମିତି କେଉଁଠି ମଧ୍ୟ ଭିଡ ହେବନାହିଁ ତାକୁ ଆଖି ଆଗରେ ରଖି ଏହି ପଦକ୍ଷେପ ନିଆଯାଇଥିବା ସୂଚନା ମିଳିଛି । ଏହି ଅବଧିରେ କେହି ଘରୁ ନବାହାରିବା ପାଇଁ ରାଜ୍ୟ ସରକାରଙ୍କ ତରଫରୁ ପରାମର୍ଶ ଦିଆଯାଇଛି । ସମସ୍ତ ଅତ୍ୟବଶ୍ୟକୀୟ ସାମଗ୍ରୀ ଏବଂ ଏହାର ପରିବହନ ବାଧାପ୍ରାପ୍ତ ହେବନାହିଁ ବୋଲି ଟ୍ୱିଟ କରି ସୁଚନା ଦେଇଛନ୍ତି ପ୍ରଦୀପ ଜେନା ।
ପୂର୍ବରୁ ସାରା ରାଜ୍ୟରେ ୩୧ ତାରିଖ ଏବଂ ୧ ତାରିଖ ପାଇଁ ରାଜ୍ୟ ସରକାରଙ୍କ ପକ୍ଷରୁ କଟକଣା ଜାରି କରାଯାଇଥିଲା । ହୋଟେଲ, କଲ୍ୟାଣମଣ୍ଡପ, ରେଷ୍ଟୁରାଣ୍ଟ ଭଳି ସ୍ଥାନରେ ଗହଳି ଏଡାଇବା ଉପରେ ଜୋ ଦିଆଯାଇଥିଲା । ନୁଆବର୍ଷକୁ ସ୍ୱାଗତ କରିବାକୁ କୈାଣସି କାର୍ଯ୍ୟକ୍ରମ ଏବଂ ଜନସମାଗମ ଉପରେ ରୋକ ଲଗାଇଥିଲେ ସରକାର । ଯଦି କେହି ଏହାର ଉଲ୍ଲଂଘନ କରନ୍ତି ତେବେ କାର୍ଯ୍ୟାନୁଷ୍ଠାନର କଥା ମଧ୍ୟ କୁହାଯାଇଥିଲା । ଆଉ ଏବେ ନାଇଟ କର୍ଫ୍ୟୁ ଲାଗୁ କରି ସରକାର ଲୋକଙ୍କ ଘରୁ ବାହାରିବା ଉପରେ ମଧ୍ୟ ରୋକ ଲଗାଇଛନ୍ତି ।
ଅନୁମାନ କରାଯାଉଛି, କିଛି ବ୍ରିଟେନ ଫେରନ୍ତା ବ୍ୟକ୍ତି ପଜିଟିଭ ଚିହ୍ନଟ ହେବା ପରେ ସତର୍କତାମୁଳକ ଭାବେ ଏହି ପଦକ୍ଷେପ ଗ୍ରହଣ କରାଯାଇଛି । ସଂକ୍ରମଣକୁ ରୋକିବା ପାଇଁ ହେଲେ ବଡ ଧରଣର ଜନ ସମାଗମ ଉପରେ ରୋକ ଲାଗିବା ଜରୁରୀ । ତେଣୁ ଘରେ ରହି ସମସ୍ତେ ନୁଆବର୍ଷ ପାଳନ କରିବାକୁ ସରକାର ଏହି ନିଷ୍ପତ୍ତି ମାଧ୍ୟମରେ ଜଣାଇଛନ୍ତି ।