Get real time updates directly on you device, subscribe now.
କୋଟି କୋଟି ଜଗନ୍ନାଥ ପ୍ରେମୀ ଏବେ ଶ୍ରୀମନ୍ଦିର ଦ୍ୱାରକୁ ଚାହିଁ ରଖିଛନ୍ତି, କେବେ ଶ୍ରଦ୍ଧାଳୁଙ୍କ ପାଇଁ ଦ୍ୱାର ଫିଟିବ ଏବଂ ସେମାନେ ଠାକୁର ଦର୍ଶନ କରିବେ । କୋଭିଡ୍ କାରଣରୁ ପ୍ରାୟ ୯ ମାସ ହେଲାଣି, ଭକ୍ତଙ୍କ ପାଇଁ ବନ୍ଦ ରହିଛି ଶ୍ରୀମନ୍ଦିର । ଜଗାକୁ ଦେଖିବାକୁ ଭକ୍ତ ବ୍ୟାକୁଳ ହୋଇଗଲେଣି । ଆଉ ଏହାରି ଭିତରେ ଶ୍ରୀମନ୍ଦିର ଖୋଲିବା ପାଇଁ ପରିଚାଳନା କମିଟି ସଦସ୍ୟ ଓ ବରିଷ୍ଠ ସେବାୟତଙ୍କ ସହ ଶ୍ରୀମନ୍ଦିର ପ୍ରଶାସନ ବିଚାରବିମର୍ଶ ଜାରି ରଖିଛି । ଆସନ୍ତା ୧୨ ତାରିଖରେ ଛତିଶା ନିଯୋଗ ବୈଠକ ଅଛି । ବୈଠକରେ ଶୀମନ୍ଦିର ଖୋଲିବା ଉପରେ ନିଷ୍ପତି ନିଆଯିବା ବୋଲି ଆଶା କରାଯାଉଛି । ବୈଠକରେ ନିଷ୍ପତି ନିଆଯିବା ପରେ ଏନେଇ ରାଜ୍ୟ ସରକାରଙ୍କୁ ଅବଗତ କରାଯିବ । ଆଉ ରାଜ୍ୟସରକାରଙ୍କ ନିର୍ଦ୍ଦେଶ ପରେ ଶ୍ରୀମନ୍ଦିର ଖୋଲିବା ନେଇ ବ୍ୟବସ୍ଥା କରାଯିବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ କୁହାଯାଇଛି ।
ଆଜି ଶ୍ରୀମନ୍ଦିର ଖୋଲିବା ପାଇଁ ବିଶ୍ୱ ମାନବାଧିକାର ସୁରକ୍ଷା ସଂଗଠନର କର୍ମୀମାନେ ପୁରୀ ବଡ଼ଦାଣ୍ଡରେ ବିକ୍ଷୋଭ କରିଥିଲେ । ଶ୍ରୀମନ୍ଦିର ପ୍ରଶାସନକୁ ମନ୍ଦିର ଖୋଲିବା ନେଇ ଦାବି ମଧ୍ୟ ଜଣାଇଛନ୍ତି । ବିଭିନ୍ନ ରାଜ୍ୟରେ ମନ୍ଦିର, ମସଜିଦ ଖୋଲାଯାଇଥିବା ବେଳେ ଶ୍ରୀମନ୍ଦିର କାହିଁକି ଖୋଲାଯିବନାହିଁ ବୋଲି ସେ ପ୍ରଶ୍ନ କରିଛନ୍ତି । ମନ୍ଦିର ଭିତରକୁ ଭକ୍ତଙ୍କ ପ୍ରବେଶ କଟଣାକୁ ଦୃଢ ନିନ୍ଦା କରିଛନ୍ତି । ଶ୍ରୀମନ୍ଦିର ବନ୍ଦ ଯୋଗୁଁ ପର୍ଯ୍ୟଟନ କ୍ଷେତ୍ର ପୁରୀ ଆର୍ଥିକ ପରିସ୍ଥିତି ଦେଇ ଗତିକରୁଛି । ତେଣ ଅତିଶୀଘ୍ର ମନ୍ଦିର ଖୋଲିବାକୁ ବିଶ୍ୱ ମାନବାଧିକାର ସୁରକ୍ଷା ସଂଗଠନ ପକ୍ଷରୁ ଦାବି କରାଯାଇଛି ।
ଏପଟେ ଶ୍ରୀମନ୍ଦିର ଖୋଲିଲେ-କେମିତି ଦର୍ଶନ କରିପାରିବେ ଶ୍ରଦ୍ଧାଳୁ ? କୋଭିଡ୍ କଟକଣାକୁ କେମିତି ପାଳନ କରାଯିବ ? ସେନେଇ ଜିଲ୍ଲା ପ୍ରଶାସନ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି ।