Get real time updates directly on you device, subscribe now.
ରାଜ୍ୟ ବିଜେପିରେ ଅସଲ ନେତା କିଏ? ଗଣମାଧ୍ୟମରେ ବରିଷ୍ଠ ନେତା ତଥା ବିଧାୟକ ମୋହନ ମାଝୀ ରଖିଥିବା ଏକ ଉତ୍ତର ଏବଂ ପ୍ରକୃତ କାର୍ଯ୍ୟଶୈଳୀକୁ ଦେଖିଲେ ଏଭଳି ପ୍ରଶ୍ନ ଉଠିବା ସ୍ୱାଭାବିକ । ଖାସ୍ କରି ପୁରୀ ମନ୍ଦିର ବିକାଶ କାର୍ଯ୍ୟ ଏବଂ ଏକାମ୍ରକ୍ଷେତ୍ର ପ୍ରକଳ୍ପକୁ ନେଇ ଏଭଳି ଦ୍ୱନ୍ଦ୍ୱ ଦେଖିବାକୁ ମିଳିଛି । ଦଳର ବିଧାୟକ ଗଣମାଧ୍ୟମକୁ କହିଥିଲେ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଯେଉଁ ବୟାନ ରଖନ୍ତି, ତାହାହିଁ ରାଜ୍ୟ ବିଜେପିର ମତ । ହେଲେ ଏଥିରେ ସତ୍ୟତା କେତେ, ତାକୁ ନେଇ ଏବେ ଦଳୀୟ ମହଲରେ ଚର୍ଚ୍ଚା । କାରଣ ୨ ବର୍ଷ ତଳେ ଦଳରେ ସାମିଲ ହୋଇ ପ୍ରଶାସକରୁ ସାଂସଦ ହୋଇଥିବା ଅପରାଜିତା ଷଡଙ୍ଗୀ ଧର୍ମେନ୍ଦ୍ର ପ୍ରଧାନଙ୍କ କଥା ଶୁଣୁନଥିବା କୁହାଯାଉଛି । ଦଳୀୟ ସଂଗଠନ ବାହାରେ ନିଜର ଏକ ସଂଗଠନ କରି କାର୍ଯ୍ୟ କରୁଛନ୍ତି । ପାର୍ଟି ଅଫିସକୁ କମ୍ ଆସୁଛନ୍ତି, ନିଜର ଏକ ସ୍ୱତନ୍ତ୍ର ଅଫିସ କରି ପୁରା ରାଜ୍ୟର ସ୍ଥିତି ଉପରେ ମୁଣ୍ଡ ଖେଳାଉଛନ୍ତି । ସରଳ ଭାଷାରେ କହିବାକୁ ଗଲେ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ପରୋକ୍ଷରେ ଚ୍ୟାଲେଂଜ ଦେଇଚାଲିଛନ୍ତି ଏହି ନେତ୍ରୀ ।
ପୁରୀ ଗସ୍ତରେ ଯାଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମନ୍ଦିର ବିକାଶ ପାଇଁ ନିଜ ଦରମାରୁ ଲକ୍ଷେ ଟଙ୍କା ଦାନ କଲେ । ହେଲେ ଅପରାଜିତା ଷଡଙ୍ଗୀ ଯାଇ ତାକୁ ଖୋଲାଖୋଲି ବିରୋଧ କଲେ । ରାଜ୍ୟ ବିଜେପି ବିଧାୟକ ଦଳ ବିଧାନସଭାରେ ଏନେଇ ଆସିଥିବା ସଂକଳ୍ପ ପ୍ରସ୍ତାବକୁ ସମର୍ଥନ କଲେ, ଅପରାଜିତା ବିରୋଧ କଲେ । ସେହିଭଳି ଏକାମ୍ରକ୍ଷେତ୍ର ପାଇଁ ମଧ୍ୟ ଦଳ ଭିତରେ ଅଲଗା ଅଲଗା ଆଭିମୁଖ୍ୟ ଦେଖିବାକୁ ମିଳିଲାଣି । ଦୁଇ କେନ୍ଦ୍ରମନ୍ତ୍ରୀ ଗୋଟିଏ ପ୍ରକାରର କଥା କହୁଛନ୍ତି, ସାଂସଦ ଭିନ୍ନ କଥା କହୁଛନ୍ତି । ରାଜ୍ୟ ବିଜେପିରେ ଯେ ତାଳମେଳର ଅଭାବ ତାହାନୁହେଁ ବରଂ ଲାଗୁଛି ଦିଲ୍ଲୀରୁ ଅପରାଜିତାଙ୍କୁ ମିଳୁଥିବା ସମର୍ଥନ ଆଉ ସାହାସକୁ ସେ ରାଜ୍ୟ ରାଜନୀତିରେ ଦେଖାଉଛନ୍ତି । ସାରା ଓଡିଶାରେ ନିଜର ଏକ ବେସ୍ ତିଆରି କରି ଧର୍ମେନ୍ଦ୍ରଙ୍କୁ ଚ୍ୟାଲେଂଜ ଦେଉଛନ୍ତି ଏହି ନେତ୍ରୀ । ଯାହା ଫଳରେ କର୍ମୀଙ୍କ ମନରେ ଦ୍ୱନ୍ଦ୍ୱ ଦେଖିବାକୁ ମିଳୁଛି । ସେମାନେ କାହା କଥା ଶୁଣିବେ ଆଉ କାହା କଥା ଅନୁସାରେ କାର୍ଯ୍ୟ କରିବେ ।
ରାଜ୍ୟ ବିଜେପିରେ ଚାଲିଥିବା ଚର୍ଚ୍ଚା ଅନୁସାରେ, ଧର୍ମେନ୍ଦ୍ରଙ୍କୁ ଧୀରେ ଧୀରେ ଦଳ ସାଇଡ୍ କରିବା ଆରମ୍ଭ କଲାଣି । ଅପରାଜିତାଙ୍କୁ ଦିଲ୍ଲୀରୁ ଗ୍ରୀନ ସିଗନାଲ ମିଳିଥିବା ଦଳର କର୍ମୀ କହୁଛନ୍ତି । ହେଲେ ଏଥିରେ ବାସ୍ତବତା କମ୍ ଥିବା ଜଣାପଡୁଛି । ମୁଳ କଥା ହେଲା, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ହେଉଛନ୍ତି ଅମିତ ଶାହା କ୍ୟାମ୍ପର ଲୋକ ଆଉ ଅପରାଜିତା ହେଉଛନ୍ତି ଜେ. ପି. ନଡ୍ଡାଙ୍କ କ୍ୟାମ୍ପର ଲୋକ । ତେଣୁ ଦୁଇ କ୍ୟାମ୍ପ ମଧ୍ୟରେ ଏବେ ଶୀତଳ ଯୁଦ୍ଧ ଚାଲିଛି । ଯଦିଓ ଉପରକୁ ସବୁ କିଛି ଠିକ ଲାଗୁଛି, ତେବେ ନିରିଖେଇ ଦେଖିଲେ ଜାଣିପାରିବେ, କିଭଳି ଦଳ ଭିତରେ ସ୍ଥିତି ବିସ୍ଫୋରକ ଅବସ୍ଥାରେ ରହିଛି । ଯାହାର ପ୍ରଭାବ କର୍ମୀ ଆଉ ସାମ୍ନାକୁ ଆସି ବକ୍ତବ୍ୟ ରଖୁଥିବା ନେତାଙ୍କ ଉପରେ ପଡୁଛି । କେଉଁ ଆଭିମୁଖ୍ୟ ରଖିବେ ଆଉ କଣ କହିବେ, କେଉଁ ନେତାଙ୍କ କଥାରେ ଚାଲିବେ, ଏକ ବଡ ସମସ୍ୟା ଦଳ ଭିତରେ ସୃଷ୍ଟି କରିଥିବା ଦଳୀୟ ମହଲରେ ଚର୍ଚ୍ଚା ଚାଲିଛି ।